இந்திய-நேபாள உறவு: பிரதமர் மோடி பெருமிதம்

புத்தர் பிறந்த தினத்தையொட்டி நேபாளத்துக்குச் சென்ற பிரதமர் நரேந்திர மோடி, இரு நாடுகளுக்கும் இடையே நிலவிவரும் நல்லுறவால் ஒட்டுமொத்த மனித சமூகமும் பலனடைந்து வருவதாகத் தெரிவித்தார்.

லும்பினி/கோரக்பூர், மே 16: 

உலகம் முழுவதும் 2566-ஆவது புத்த ஜெயந்தி திங்கள்கிழமை கொண்டாடப்பட்டது. முக்கியமாக, புத்தர் பிறந்த இடமான நேபாளத்தில் உள்ள லும்பினியில் கொண்டாட்டங்கள் களைகட்டின. புத்த பூர்ணிமாவையொட்டி அங்கு சர்வதேச பௌத்த மாநாடு நடைபெற்றது. நேபாள பிரதமர் ஷேர் பகதூர் தேவுபா, அமைச்சர்கள், பௌத்த துறவிகள், ஆய்வாளர்கள், சர்வதேச விருந்தினர்கள் உள்ளிட்டோர் மாநாட்டில் கலந்துகொண்டனர். அதில் பங்கேற்ற பிரதமர் மோடி கூறியதாவது:

இந்தியாவுக்கும் நேபாளத்துக்கும் இடையேயான நல்லுறவானது இமயமலையைப் போல வலுவுடன் உள்ளது. அசாதாரண சர்வதேச சூழலில், இரு நாடுகளுக்கிடையே தொடர்ந்து வளர்ச்சி கண்டு வரும் நட்புறவானது ஒட்டு மொத்த மனித சமூகத்துக்கும் பலனளித்து வருகிறது.

மனித சமூகம் குறித்து அறிந்து கொள்வதற்கான அடிப்படையாக புத்தரின் கொள்கைகள் உள்ளன. இந்தியாவில் உள்ள பௌத்த தலங்களான சாரநாத், புத்தகயை, குஷி நகரம் ஆகியவையும் லும்பினியும் நாடுகளுக்கிடையேயான பரஸ்பர கலாசாரத் தொடர்பை வலுப்படுத்துகின்றன. இந்த ஒத்துழைப்பு மேலும் வலுவடைய வேண்டும்.

நேபாளத்தில் லும்பினி அருங்காட்சியகத்தை இரு நாடுகளும் இணைந்து அமைத்து வருவது வலுவான ஒத்துழைப்பை வெளிக்காட்டுகிறது என்றார் அவர்.