இலங்கை பிரதமர் மகிந்த ராஜபட்ச ராஜிநாமா

வன்முறை- துப்பாக்கிச்சூடு; ஆளும் கட்சி எம்.பி., 3 பேர் பலி

கொழும்பு, மே 9:

பொருளாதார நெருக்கடியில் சிக்கியுள்ள இலங்கையில் திடீர் திருப்பமாக, பிரதமர் மகிந்த ராஜபட்ச (76) தனது பதவியை திங்கள்கிழமை ராஜிநாமா செய்தார்.

அதிபர் அலுவலகத்துக்கு எதிரே தொடர் போராட்டத்தில் ஈடுபட்டுள்ள பொதுமக்கள் மீது அவரின் ஆதரவாளர்கள் தாக்குதல் நடத்திய சில மணி நேரத்தில் ராஜிநாமா முடிவை மகிந்த ராஜபட்ச அறிவித்தார்.

இதைத் தொடர்ந்து ஏற்பட்ட வன்முறையின்போது போராட்டக்காரர்களிடம் இருந்து தப்பிக்க கட்டடத்தில் பதுங்கிய ஆளும் கட்சி எம்.பி.யும் அவரது பாதுகாவலரும் துப்பாக்கியால் சுட்டு தற்கொலை செய்து கொண்டனர்.

இலங்கையில் ஏற்பட்டுள்ள கடும் பொருளாதார நெருக்கடிக்குப் பொறுப்பேற்று அதிபர் கோத்தபய ராஜபட்சவும், பிரதமர் மகிந்த ராஜபட்சவும் பதவி விலக வேண்டுமென வலியுறுத்தி பொதுமக்களும் எதிர்க்கட்சியினரும் கடந்த ஏப். 9-ஆம் தேதிமுதல் நாடு தழுவிய தொடர் போராட்டத்தில் ஈடுபட்டுள்ளனர்.

இந்நிலையில், பிரதமர் மகிந்த ராஜபட்ச தனது பதவியை ராஜிநாமா செய்துள்ளார். இது தொடர்பாக அவர் ட்விட்டரில் வெளியிட்ட பதிவில், எனது ராஜிநாமா கடிதத்தை அதிபருக்கு அனுப்பியுள்ளேன் எனத் தெரிவித்துள்ளார்.

ராஜிநாமா கடிதத்தில் அவர் கூறியிருப்பதாவது: அனைத்துக் கட்சிகளைக் கொண்ட இடைக்கால அரசு அமைக்கவுள்ளதாக மே 6-ஆம் தேதி நடைபெற்ற அமைச்சரவையின் சிறப்புக் கூட்டத்தில் நீங்கள் (அதிபர்) தெரிவித்ததற்கு இணங்க நான் பிரதமர் பதவியை ராஜிநாமா செய்துள்ளேன்.