DILLON STERF 'N VREDEMAKER

'N MAN van integriteit en karakter.

- KHIRSTEN BOOYS

en sy twee dogtertjies, Michelay van Wyk en Feyonte Zarah Goedeman.

(FOTO'S VERSKAF)

Dít is hoe die Portervillegemeenskap Dillon Luke Wendell Faro (30) sal onthou - 'n toegewyde brandweerman, liefdevolle pa van twee dogtertjies, en 'n man wat sy lewe daaraan gewy het om ander te beskerm.Faro se lewe is Sondag-aand wreed kortgeknip toe hy om 21:57 op pad huis toe was. Na verneem word, het Faro met twee pit bull-honde te doen gekry wat hom glo probeer aanval het.

In 'n poging om homself te beskerm, het hy gemaak asof hy 'n klip optel om die honde mee af te skrik. Die situasie het egter vinnig vererger toe die honde se eienaars by die voorval betrokke geraak het.

Faro se pa, Wendell Nimmerhout (56), 'n Patriotic Alliance-raadslid, vertel sy seun is met 'n klip getref voordat hy noodlottig gesteek is.

“Die eerste klip het hom getref. Toe, in 'n oomblik van sinnelose geweld, het een van die broers hom van agter gesteek – net een hou in sy rug,” sê Nimmerhout in 'n gebroke stem.

Vir hom is die wyse waarop sy seun gesterf het besonder moeilik om te verwerk.

“As hy dalk siek was of as hy in die uitvoering van sy werk in 'n brand gesterf het, sou dit seker vir my minder moeilik gewees het. Maar net die feit dat hy só vermoor is …”

Nimmerhout het op die toneel aangekom terwyl forensiese speurders besig was om sy seun se liggaam weg te neem.

“Ek wou nie kyk nie, want ek wil hom nie so onthou nie – nie tussen 'n klomp bloed nie.”