DOOD KAN FAMILIE NET NIE UITLOS

Scottsville treur behoorlik oor die verlies van geliefde inwoners

- 

NET 'n week ná sy oupa se begrafnis is 'n negejarige seun van Scottsville in Kraaifontein deur 'n afleweringsmotorfiets doodgery.

Kayden “Tiekie” du Plooy se lewe het Vrydag om 17:46 tot stilstand gekom toe hy en sy broer Jayden (11) die pad wou oorsteek.

Die ongeluk het op die hoek van Petuniastraat en Frans Conradie-rylaan plaasgevind toe die twee op pad na die Red Ribbon Foundation was waar hulle glo kospakkies sou gaan afhaal.

Kayden en Jayden se oupa Benjamin du Plooy is net 'n week voor die noodlottige ongeluk begrawe.

Hy is drie maande gelede deur 'n motorfiets in Old Paarl Road omgestamp.

Benjamin is maande later aan longkomplikasies dood.

Die broers was reeds sedert 2022 in sy sorg ná hulle ma, Annelize, se dood.

Faren Boer (33), 'n familielid, het aan Son gesê: “Ons as familie weet nie hoe om te voel nie, want 'n week voor Kayden se dood, ook op 'n Vrydag, het ons ons oupa begrawe.”

Boer sê die kids het saam met hulle ma se broer Renaldo gestap, maar die oom was glo reeds aan die ander kant van die pad.

Hy het toe vir hulle geskreeu dat hulle nie oor die pad moet kom nie omdat daar 'n motorbike aangery kom.

Kayden het egter glo sy hand losgeruk van sy broer se hand, en oor die pad gehardloop.