'SEUN SE SIEL RUS NOG NIE'

Sy glo dat haar seun nog nie rus vir sy siel gevind het nie nadat hy glo in haglike omstandighede in die Robertson-hospitaal gesterf het.

- BASIL DAVIDS

Joey van As sê dit is vandeesmaand presies 'n maand sedert haar seun Anthony van As (40) gesterf het.

"Ek het hom hospitaal toe geneem aangesien hy swart goed begin opbring het, en ek was baie bekommerd," het sy hartseer gesê.

Volgens haar het sy hom toe sy hom die aand van sy dood besoek het, nie onmiddellik in die bed raakgesien nie.

"Toe ek na my seun soek, het hy agter die deur op sy rug skuins oor sy bed gelê. Ek kon duidelik sien hoe die braaksel uit sy mond geloop het, wat alreeds hard in sy neus en oor sy gesig geword het," het sy ontevrede gesê.

Toe sy met Anthony wou praat, het hy sy laaste roggel gegee en sy het toe geweet dat hy nie meer met haar is nie.

"Ek het histeries na die kantoor gehardloop waar die nurses gesit het," het sy gesê.