MA HUIL NÁ JAAR STEEDS

'N MAMMIE van Moorreesburg sit steeds met 'n diep seer nadat haar driejarige dogtertjie laas jaar gesterf het en geen nadoodse ondersoek gedoen is nie.

- KHIRSTEN BOOYS

Chenay Mchithakali (25) se baby girl, Naz-Ley Prins, het op 4 Junie 2024 gesterf, twee weke voordat sy vier sou geword.

Sy vertel alles het begin toe Naz-Ley op 5 Februarie 2024 die eerste keer crèche toe gegaan het. Ná net 'n paar dae het die crèche-personeel opgemerk dat die kleintjie se oë geel word.

"Hulle het by die kliniek gesê sy het geelsug en ons moet haar oorplaas na die Swartland Hospitaal op Malmesbury sodat sy op 'n drip gesit kan word,” vertel die ma.

By die Swartland Hospitaal is toetse gedoen en lewer-infeksie is by Naz-Ley gediagnoseer, maar volgens Chenay is sy vertel daar's niks wat hulle kan doen nie omdat die lewer op sy eie moet gesond word.

Naz-Ley is toé oorgeplaas na die Tygerberg Hospitaal, waarna hospitaalbesoeke die een na die ander gevolg het.

Chenay vertel verder dat haar dogtertjie uit die crèche gehaal moes word, terwyl hulle tussen die hospitaal en die huis gependel het.

"Ons was 'n maand in Tygerberg, toe twee weke tuis, en toe weer 'n maand terug in die hospitaal."