WIL G'N TREK NIE, MAAR ...

BEWONERS van 'n plaas naby Melkbosstrand sê die eienaars van die grond wil hulle nou soos ou vullis weggooi.

- ANELE MFAZWE

Dít nadat hulle ouers en grootouers vir die eertydse varkplaas hulle bloed, sweet en trane opgeoffer het vir die plaas wat nou as Kleine Zout Rivier bekend staan.

Sowat 35 gesinne woon tans op dié plaas langs die Weskus-pad (R27), ongeveer 5 km buite Melkbosstrand. Dit bestaan meestal uit shacks wat aangebou is aan vervalle ou plaashuise.

Frank October (48), wat al van die ouderdom van 12 daar woon, sê die eienaars wil hulle nou verwyder van die stuk grond waarop hulle woon, want hulle wil dit verkoop en geld maak.

"Ons het verneem dat die eienaars diep in die skuld is en dié is deel van hulle plan om hulself daaruit te wurm," het hy verder gesê.

Volgens hom was die plek voor die demokratiese politieke bestel 'n varkplaas, waar plaaswerkers gewoon het. Die varkplaas bestaan nie meer nie. Maar ná 1994 het die eienaars begin om rent van hulle te eis.