HUISVRIEND IS TOE 'N JAKKALS

Gesiene man van Strand ontneem glo 15-jarige haar onskuld

- 

'N WOLF in skaapsklere. Dis hoe 'n familie van die Strand voel nadat hulle 'n gemeenskapsleier en voorsitter van die gemeenskapspolisiëringsforum vertrou en in hulle huis toegelaat het.

Nou het dié einste man glo hulle 15-jarige dogter seksueel misbruik.

Dié saak het die afgelope week opslae in die media gemaak nadat dit aan die lig gekom het dat 'n leiersfiguur in die Strand-gemeenskap op twee klagte van seksuele aanranding gearresteer is en in die hof verskyn het.

Lt.kol. Malcolm Pojie, 'n polisiewoordvoerder, het bevestig die beskuldigde is in aanhouding en sal op 14 Augustus weer in die hof verskyn vir 'n borgtogaansoek.

"Die polisie het die 56-jarige verdagte op 6 Augustus in hegtenis geneem in verband met twee klagte van seksuele aanranding teen hom. Hy het dieselfde dag in die Strand-landdroshof verskyn."

CHRISLYNN SIAS-LOUW

Die verslae ouma van die 15-jarige tiener sê haar hart is stukkend, want sy het die man genader om haar kleindogter te help en kyk waarop het dit afgestuur.

Volgens die ouma het die kind vroeër vanjaar vanaf Upington terug huis toe gekom.

Hulle kon nie plek vir haar kry by 'n skool in die area nie en dis hoekom die ouma toe die beskuldigde om hulp genader het.