HY STERF AS 'N VEGTER

DIE dokters het gesê hy sal net tot 12 jaar oud lewe, maar Emmanuel Booysen het hulle voorspelling met 'n hele dekade oortref.

- KHIRSTEN BOOYS

Die 21-jarige van Diazville in Saldanhabaai aan die Weskus is Dinsdagoggend in die Life West Coast-hospitaal in Vredenburg oorlede.

Booysen se suster, Samantha Booysen-Louw (30), vertel dat asma van kindsbeen af by haar boetie gediagnoseer is.

Maar 'n mediese fout het Emmanuel se lewenspad vir altyd verander toe hy glo op verkeerde medikasie gesit is. Volgens Samantha is haar broer destyds verkeerdelik vir TB behandel. Die medikasie het glo sy longe aangetas.

"Toe Emmanuel twee jaar oud was, het die dokters die helfte van sy linkerlong verwyder. Vyf jaar later, op sewe, is sy linkerlong heeltemal verwyder."

Die dokters het toe gesê hy sal waarskynlik net tot die ouderdom van 12 lewe.

Booysen was sedertdien op medikasie en was by die hospitaal in en uit. Ondanks sy gesondheidsuitdagings het hy 'n "normale" lewe gelei en het hy ook sy skoolloopbaan by die Sekondêre Skool Worcester voltooi toe hy vier jaar in Worcester gewoon het. Hy het ook 'n tweejarige seuntjie, Noah.