LAASTE PRENT VAN PA IS GRU

Familie voel begrafnisondernemer het nie hul geliefde se lyk versorg

- CHRISLYNN SIAS-LOUW

DIT moet 'n nare en traumatiese ervaring wees om vir die laaste keer jou pa te gaan was en aantrek vir sy begrafnis en te besef sy liggaam is reeds aan die ontbind.

Asof die seer van die verlies van 'n pa nie genoeg is nie, sit die Van Wyk-familie nou met die letsels van die laaste beeld van hulle geliefde pappie, Abraham van Wyk (63) - een waar sy velle van sy liggaam afval en hy reeds begin vrot het.

Dis die laaste ding wat 'n mens verwag wanneer jy jou laaste eerbied aan jou geliefde wil betoon, vertel Audrey Isaacs (42), Van Wyk se oudste dogter.

Van Wyk is op 7 Julie uit die hospitaal ontslaan nadat mediese personeel niks meer vir hom kon doen nie. Hy is op 8 Julie by die huis, op 'n plaas buitekant Worcester, oorlede. Die familie het 'n polis gehad by Valley Funerals en het hulle ontbied toe die oom sterf.

Audrey vertel: "Ons het besluit dat ons hom op 19 Julie gaan begrawe en op 17 Julie het ons na die funeral parlour gegaan sodat my jonger suster en my seunskind hulle oupa kon gaan was en vir die laaste keer aantrek voor hy onder die grond gaan."

Ruik

Met hulle intrapslag het hulle 'n reuk gekry, maar het nie veel daarvan gedink nie, verklap Audrey.