EEN STEEK EIS JONG PA

VOORDAT die Barbarian-rugbyspeler van Mosselbaai Leroy Koopman (34) sy laaste asem uitgeblaas het, het hy 'n boodskap vir sy vrou gelos: "Sê vir haar ek is baie lief vir haar en sy moet mooi na ons kinders kyk.

- Chrislynn Sias-Louw

En toe gee hy 'n laaste doodsroggel. Weg vir ewig.

Met sy vrou, Janine Koopman (33), se aankoms op die toneel was al wat sy wou weet of haar man vir haar 'n boodskap gelos het. En hy het.

Leroy, 'n pa van drie, is na bewering in 'n stryery doodgesteek deur iemand wat hy ken. Hy is een keer in sy bors gesteek en het aan sy besering beswyk. Die voorval het Sondag, op Vadersdag, in die vroeë oggendure plaasgevind.

Volgens Janine het sy Saterdagaand by haar ma se huis gekuier en geslaap omdat hulle haar suster se verjaardag gevier het. Leroy was ook die Saterdagaand daar nadat hy die middag 'n rugbywedstryd gaan kyk het, maar het weer 'n draai geloop.

Straat

Om 04:00 Sondagoggend het iemand hulle wild kom wakker klop op soek na Janine. Die persoon se woorde het koue rillings langs Janine se ruggraat gestuur.

"Jy moet kom. Jou man lê dood daar bo in die straat."

Ongeloof, toe hartseer en daarna woede, is wat Janine ervaar het met haar aankoms op die toneel. Haar man was toe reeds dood.