Garddio yn cynnig noddfa i gerddor

RHANDIR YN IACHAU MEDDWL EICON ROC AR OL DIAGNOSIS CANSER

- 

AE eicon roc Cymreig sy'n brwydro yn erbyn canser y prostad cam tri yn tyfu hadau blodau gwyllt a roddwyd iddo gan ddylunydd recordiau'r Sex Pistols fel rhan o'i adferiad.

Bydd Rhys Mwyn, oedd yn arfer chwarae bas gyda'r Yr Anhrefn y band pync Cymraeg o'r 1980au, yn trafod iachâd trwy arddio ar gyfres deledu newydd.

Bydd Rhys, sy'n 63 oed, yn ymdangos ar raglen boblogaidd S4C, Garddio a Mwy, yn siarad o'i randir am sut y mae gofalu am blanhigion yn cefnogi ei iechyd meddwl a lles.

Cafodd y cerddor, sy'n wreiddiol o Lanfair Caereinion ym Mhowys ac sydd bellach yn byw yng Nghaernarfon, ddiagnosis canser y llynedd ac mae bellach yn wynebu dwy flynedd o ymweliadau a thriniaeth ysbyty, gan gynnwys radiotherapi.

Yn y cyfweliad gyda'i gyd-gerddor Meinir Gwilym, sy'n un o dri phrif gyflwynydd y rhaglen, mae Rhys yn disgrifio'r rhandir fel “noddfa o heddwch”.

Wedi'i chynhyrchu gan Cwmni Da o Gaernarfon, bydd y gyfres newydd o Garddio a Mwy yn cael ei darlledu am 8.25pm ar nosweithiau Llun dros yr haf tan fis Hydref.

Y rhaglen sy'n cynnwys eitem Rhys Mwyn fydd y bedwaredd yn y gyfres ac yn cael ei darlledu ar nos Lun, Ebrill 27. Ynddi bydd Rhys yn apelio at ddynion dros 50 oed i wneud yn siwr eu bod yn cael eu profi am ganser y prostad.

Dywedodd Rhys: “Cefais ddiagnosis yr hydref diwethaf ar ôl cael amrywiaeth o brofion. Mae'n Gam 3, sy'n ganser difrifol ond yn un y gellir ei drin.