Cwmni trelars yn parhau i noddi timau rygbi ifanc

MAE gwneuthurwr trelars o ogledd Cymru yn helpu i lunio dyfodol rygbi Cymru drwy gefnogi talent ifanc disglair y rhanbarth.

- 

Mae Ifor Williams Trailers, sydd â ffatrïoedd yn Sir Ddinbych a Glannau Dyfrdwy, wedi adnewyddu ei nawdd i dimau dan 16 a dan 18 Rygbi Gogledd Cymru (RGC) sy'n datblygu doniau rygbi disgleiriaf y rhanbarth.

Mae'r cytundeb yn golygu y bydd y ddwy garfan yn parhau i redeg allan ar y cae mewn citiau cartref ac oddi cartref sy'n cario logo nodedig y cwmni, gan gadw'r bartneriaeth yn llygad y cyhoedd.

Datgelwyd y citiau newydd trawiadol - du ar gyfer gemau cartref a marŵn ar gyfer gemau oddi cartref - yn ystod sesiwn hyfforddi yng nghhartref RGC yn Stadiwm Eirias ym Mae Colwyn.

Y nod yw i chwaraewyr RGC fynd yr holl ffordd i'r brig, gan chwarae rygbi proffesiynol a chynrychioli Cymru yn y gêm hŷn.

Dywedodd y rheolwr cyffredinol Alun Pritchard: "Mae'r nawdd gan Ifor Williams Trailers yn bwysig gan ei fod yn gweld dau sefydliad amlwg yn y Gogledd yn dod at ei gilydd i gefnogi ein pobl ifanc.

"Rydym yn falch o gynrychioli'r rhanbarth a'n cymunedau. Rwy'n ymwybodol bod Ifor Williams Trailers yn rhannu'r ethos hwnnw, sy'n helpu i asio'r bartneriaeth gref hon.

"Mae RGC yn darparu cyfleoedd i chwaraewyr ifanc ddatblygu eu sgiliau chwarae rygbi, a'n huchelgais yw rhoi llwyfan i bawb fod yn rhan o'r gêm."

Ychwanegodd rheolwr marchnata Ifor Williams Trailers, Joe Pardoe, chwaraewr rygbi brwd a chefnogwr y tîm cenedlaethol: "Mae rygbi yn rhan annatod o fywyd diwylliannol Cymru ac mae gan Ifor Williams Trailers hanes balch o gefnogi'r gymuned mewn pob math o weithgareddau.