கொள்கை குழப்பமும் அரசியல் அனர்த்தமும்...

எந்த ஒரு அரசியல் கட்சியும் கொள்கை குழப்பம் கொள்ளும் போதும், அரசியல் செயல்பாட்டில் தவறும் போதும் மக்களுடைய நம்பிக்கையை இழந்து விடுகிறது. தமிழ்நாட்டில் புதிதாய் தொடங்கப்பட்டுள்ள த வெ க, தந்தை பெரியாரையும் காமராஜரையும் அம்பேத்கரையும் ஆசான்களாக முன்னிறுத்தி தனது பயணத்தை தொடங்கிய போது ஒருவித நம்பிக்கை இளைய தலைமுறையிடம் தோன்றியது. ஆனால் அதன் தொடர் செயல்பாடுகள் அந்த நம்பிக்கையை சிறிது சிறிதாக சிதைத்து விட்டது.

- 

குறிப்பாக, மாநில சுயாட்சி பேசிவிட்டு, ஆளுநர் பதவி தேவையில்லை என்று அறிவித்துவிட்டு, கவர்னரிடம் மனு கொடுக்க காத்துக் கிடந்தது அவர் மீதான நம்பிக்க தன்மையை தளர்த்தி விட்டது.

அவர் கொடுத்த அரசியல் எதிரி, கொள்கை எதிரி விளக்கமும் குழப்பத்தில் உச்சமாக இருந்தது. கொள்கை தவறிய கட்சி அரசியல் அறநெறிப் பிறழ்ந்தது ஆகும். அதாவது கொள்கை எதிரி தான் அரசியல் எதிரிகள்.

தாங்கள் ஏற்றுக் கொண்ட அரசியல் முன்னோடிகளுக்கு மாறான கருத்துக்களை கொண்டிருக்கும் பாஜக, அதிமுக போன்ற கட்சிகளை அரசியல் எதிரிகளாக கருதுவது ஏற்புடையதாக இருக்கும். மாறாக, பெரியாரை, சமூகநீதியை, மாநில சுயாட்சியை பின்பற்றுகின்ற திராவிட முன்னேற்றக் கழகத்தை மேடைதோறும் அரசியல் எதிரியாக பிரகடனப்படுத்துவது அவர்களை அம்பலப்படுத்துவதாக உள்ளது.