தொழிலாளர்கள் விருப்பத்துடன் செயல்படுத்துங்கள்

மே தினிக்கு தொழிலாளர் மேன்மையை எடுத்துரைத்த மே தினம் வந்து போய் ஒரு மாதமே ஆகியுள்ளது. மே தினத்தின் முக்கிய வெற்றியே, முழுநேரமும் உழைப்பு சுரண்டப்பட்ட உலகத் தொழிலாளர்களுக்கு 8 மணி நேரமாக வேலையை நிர்ணயித்தது தான். கடின போராட்டங்களுக்கு நடுவே ரத்தம் சிந்திப் பெற்ற அந்த உரிமையை உதாசீனப்படுத்துவது போல், ஆந்திர அரசு தனியார் தொழிலகங்களில் தொழிலாளர்களுக்கு 10 மணிநேர வேலையை சட்டமாக்க உத்தேசித்துள்ளது. அதற்காக ஆந்திரப்பிரதேச தொழிற்சாலைகள் சட்டத்தில் திருத்தம் செய்ய முடிவெடுத்துள்ளது.

- 

வணிக செயல்பாடுகளை எளிமையாக்குதல் என்ற கொள்கையின் ஒரு பகுதியாக முதலீடுகளை ஈர்க்கவும் தொழிற்துறையை வளர்க்கவும் இந்த முடிவு எடுக்கப்பட்டதாக கூறப்படுகிறது. ஏற்கனவே வெளிநாட்டு முதலீட்டை ஈர்ப்பதில் தென்னிந்திய மாநிலங்களிடையே மறைமுகப் போட்டி நிலவுகிறது. கார்ப்பரேட்கள் தங்கள் முதலீட்டின் மூலம் நிலம், உழைப்பு போன்றவற்றை சுரண்டியே அதீத லாபம் ஈட்ட முடியும். அதற்காக நில ஆர்ஜித சட்டத்தில் ஒன்றிய அரசு திருத்தம் கொண்டுவந்தது. வனப்பகுதியில் தொழிற்சாலை அமைக்க ஏதுவாக வனச்சட்டத்தை திருத்தியது.