తెలంగాణ పల్లె పోరు

తొలి విడతలో 3,834 సర్పంచ్ పదవులకు 12,960 మంది అభ్యర్థులు, 27,628 వార్డులకు 65,455 మంది పోటీ పడ్డారు..

- 

• ముగిసిన తొలివిడత పంచాయతీ పోలింగ్

• స్వల్ప ఘటనలు మినహా ప్రశాంతంగా ముగింపు

• భారీగా తరలి వచ్చి ఓటేసిన గ్రామీణ ప్రజలు

• తొలి విడతలో 80 శాతానికి పైగా ఓటింగ్

• ఎంపిక చేసిన కేంద్రాల్లోనే బ్యాలెట్ల లెక్కింపు

• తొలిదశలో 3,834 సర్పంచ్ స్థానాలకు పోలింగ్

• 90శాతం సర్పంచ్ స్థానాల్లో కాంగ్రెస్ పాగా

• అత్యధిక సీట్లు గెల్చుకున్న హస్తం మద్దతుదారులు

హైదరాబాద్, డిసెంబర్ 11 (ఆదాబ్ హైదరాబాద్): రాష్ట్రవ్యాప్తంగా తొలి విడుత ఎన్నికల పోలింగ్ ముగిసింది. బుధవారం ఉదయం 7 గంటలకు మొదలైన పోలింగ్..మధ్యాహ్నం ఒంటిగంటతో పూర్తయ్యింది. పలుచోట్ల ఒంటిగంట వరకు క్యూలో ఉన్న ఓటర్లకు అధికారులు ఓటు వేసే అవకాశం కల్పించారు. మధ్యాహ్నం 2 గంటల నుంచి కౌంటింగ్ ప్రారంభం అయ్యింది. రాత్రి వరకు పోలింగ్ ఫలితాలు ప్రకటించి.. ఉప సర్పంచ్ ఎన్నికలను నిర్వహించనున్నారు. చెదురుమదురు ఘటనలు మినహా పోలింగ్ ప్రశాంతంగా సాగింది. కలెక్టర్లు, పోలీస్ ఉన్నతాధికారులు పోలింగ్ను పర్యవేక్షించారు. తొలి విడుతలో 4,236 సర్పంచ్ స్థానాలకు నోటిఫికేషన్ విడుదల కాగా.. ఇందులో 396 సర్పంచ్ స్థానాలు, 9,633 వార్డు స్థానాలు ఏకగ్రీవమయ్యాయి. మిగతా 3,834 సర్పంచ్ స్థానాలకు పోలింగ్ నిర్వహించారు. 12,960 మంది అభ్యర్థులు బరిలో ఉన్నారు. మూడు విడుతల్లో జరుగనున్న పంచాయతీ ఎన్నికల కోసం 93,905 మంది సిబ్బందిని నియమించినట్టు ఎస్ఈసీ కమిషనర్ పేర్కొన్నారు.