సిద్ధిపేటకు ఐటీ టవర్

సిద్ధిపేట యువతీ, యువకుల ఇన్ఫర్మేషన్ టెక్నాలజీ-ఐటీ కల సాకారమైంది.

- యం. రాము

జై కొట్టిన 17 కంపెనీలు

సిద్ధిపేట యువతీ, యువకుల ఇన్ఫర్మేషన్ టెక్నాలజీ-ఐటీ కల సాకారమైంది. సొంతగడ్డపైనే సాఫ్ట్వేర్ జాబ్ చేయాలన్న స్వప్నం నెరవేరింది. హైదరాబాదు, బెంగళూరు వంటి మహా నగరాలకే పరిమితమైన సాఫ్ట్వేర్ కొలువు దరి చేరింది.ఉన్న ఊరును, కన్నవాళ్లను వదిలి ఎక్కడికో వెళ్లకుండా ఉన్న చోటనే కొలువు చేసుకునే అవకాశం దక్కింది. సీఎం కేసీఆర్ ఆలోచన, ఆర్థిక మంత్రి హరీష్ ఆచరణ, ఐటీ మంత్రి కేటీఆర్ మంజూరీ వెరసి కొలువుల భవంతి సిద్ధిపేట ఐటీ టవర్ తెరచుకుని స్థానికులకే స్థానిక ఉద్యోగాలతో యువత చెంతన చేరింది.

సిద్ధిపేటలో ఐటీ టవర్, స్లాటర్ హౌస్-కబేళాను మంత్రి హరీశ్ రావుతో కలిసి కేటీఆర్ ప్రారంభించారు. రాష్ట్రంలోని అన్ని నియోజక వర్గాలు సిద్ధిపేటలా మారితే బంగారు తెలంగాణ సాధ్యమవుతుందని చెప్పారు. సిద్దిపేట అభివృద్ధికి, సిద్ధిపేట ప్రజలకు ఎంత చేసినా తక్కువేనని కేటీఆర్ పేర్కొన్నారు. కేసీఆర్ లేనిదే తెలంగాణ లేదని, సిద్ధిపేట లేనిదే కేసీఆర్ లేరని స్పష్టం చేశారు. కేసీఆర్ ఆయువు పట్టు సిద్ధిపేటగా చెబుతూ.. తెలంగాణకు జన్మనిచ్చిందే సిద్ధిపేట అని, అందుకే కేసీఆర్ కు సిద్దిపేటంటే చెప్పలేనంత ప్రేమ ఉన్నదని తెలిపారు. సిద్దిపేట దళితుల అభ్యున్నతి కోసం ఆనాడే దళిత చైతన్య జ్యోతిని ప్రారంభించారని, కేసీఆర్ సిద్ధిపేట ఎమ్మెల్యేగా ఉన్నప్పుడే హరిత హారం చేపట్టారని, లోయర్ మానేరు డ్యాము నుంచి మంచినీటి పైపు లైను వేయించారని కేటీఆర్ గుర్తు చేశారు. “సంక్షేమం. అభివృద్ధి కార్యక్రమాలతో యావత్ దేశానికే తెలంగాణ రోల్ మోడల్గా నిలవగా.. తెలంగాణలోని అన్ని జిల్లాల అభివృద్ధికి సిద్ధిపేట దిక్సూచిగా మారింది. మాలాంటి వాళ్లు అసూయపడేలా మంత్రి హరీశ్ రావు సిద్ధిపేటను అభివృద్ధి చేస్తున్నారు. తాను సిరిసిల్లా పోతుంటే సిద్ధిపేటకు రాగానే 'ఏం సంగతి బావ.. మళ్లీ ఏదో కొత్తది కడుతున్నవ్' అని అడుగుతాను. నువ్వేమీ చూడకుండా కళ్ళు మూసుకుని పొమ్మని అంటుంటాడు. బావ కాబట్టి ఏడిపిస్తుంటా” అని రాష్ట్ర ఐటీ, మున్సిపల్, పరిశ్రమల శాఖ మంత్రి కేటీఆర్ సరదా వ్యాఖ్యలు చేశారు.