રાજકાજ

રોહન ગુપ્તાને ભાજપમાં મોટી ભૂમિકા મળવાની શક્યતા

ભારતીય જનતા પક્ષના દિલ્હીના વડામથકે ગત તા. ૧૧ એપ્રિલે ચાર વ્યક્તિઓને કેન્દ્રીય મંત્રી હરદીપસિંહ પુરીની ઉપસ્થિતિમાં પક્ષમાં પ્રવેશ આપવામાં આવ્યો. તેમાં ગુજરાતના એક અગ્રણી રોહન ગુપ્તાનો પણ સમાવેશ થાય છે. આ ઘટનાને બહુ સૂચક ગણવી જોઈએ. તાજેતરના સમયમાં ગુજરાતમાં કોંગ્રેસના અને આમ આદમી પાર્ટીના અનેક અગ્રણીઓ ભાજપમાં જોડાયા છે. એ બધાનો પક્ષ પ્રવેશ ગુજરાત ભાજપના વડામથક કમલમ ખાતે સ્થાનિક અગ્રણીઓની હાજરીમાં અપાયો છે. રોહન ગુપ્તાને દિલ્હીના સમારોહમાં પ્રવેશ અપાયો કદાચ એ હોઈ શકે કે રોહન ગુપ્તા કોંગ્રેસના રાષ્ટ્રીય પ્રવક્તા હતા. તેમના એ દરજ્જાને આ રીતે સન્માન અપાયું છે, પરંતુ વાત માત્ર આટલેથી પૂર્ણ થતી નથી. રોહન ગુપ્તા યુવા નેતા છે, લાંબી રેસનો ઘોડો છે, પ્રતિભા સંપન્ન નેતા છે. ભાજપમાં જોડાયા પૂર્વેના ત્રણેક સપ્તાહ પહેલાં તેમણે કોંગ્રેસ છોડી દીધી હતી.