കേരളം ഇന്നലെ, ഇന്ന്, നാളെ...

കേരളത്തിന്റെ സാമൂഹികവും സാംസ്കാരികവു മായ മാറ്റങ്ങൾ വിലയിരുത്തുകയാണ് മുൻ കൊച്ചി പ്രധാനമന്ത്രി ഇക്കണ്ട വാര്യരുടെ സഹോദര പുത്രൻ ബാലകൃഷ്ണൻ വാര്യരും മക്കളും പേരമക്കളും...

- കെ.ആർ. ഔസേഫ്

കേരളപ്പിറവിയുടെ എഴുപതാം വാർഷികം ആഘോഷിക്കുന്ന ഈ വേളയിൽ മാറിവരുന്ന കേരളത്തിന്റെ സാമൂഹികവും സാംസ്കാരികവും രാഷ്ട്രീയവുമായ മാറ്റങ്ങൾ വിലയിരുത്തുകയാണ് മുൻ കൊച്ചി പ്രധാനമന്ത്രി ഇക്കണ്ട വാര്യരുടെ സഹോദര പുത്രൻ ബാലകൃഷ്ണൻ വാര്യർ, മകൻ രഘുനാഥ് വാര്യർ, ഭാര്യ സുനിത, ഇവരുടെ മക്കളായ അപർണ വാര്യർ, ശരണ്യ എന്നിവർ.

കാർഷിക രംഗം

കർഷക തൊഴിലാളികൾക്കുണ്ടായ കൂലി വർധന കേരളത്തിലെ കൃഷിയെ ബാധിച്ചതായി രഘുനാഥിന്റെ ഭാര്യ സുനിത പറയുന്നു. നേരത്തേ കർഷകർക്ക് കൊയ്തുകഴിഞ്ഞ് പൊലിയളക്കുന്ന രീതിയായിരുന്നു. അവർ കൂടുതൽ നെല്ലിനായി മത്സരിച്ച് ജോലി ചെയ്യുന്ന രീതി ഉണ്ടായിരുന്നു. അത് മാറി കൂലിയിലേക്ക് എത്തിയതോടെ ജോലിയെടുക്കുന്ന രീതിയിൽ മാറ്റംവന്നു.

ജോലിയോടുള്ള ആത്മാർഥത കുറഞ്ഞതോടെ സമയത്തിനുവേണ്ടി ജോലി ചെയ്യുന്ന പ്രവണതയിൽ കാലം എത്തി. അതും കൃഷിയിൽ നിന്ന്കേരളീയരെ അകറ്റി നിർത്താൻ കാരണമായി എന്ന് പറയാമെന്നാണ് സുനിയുടെ വിലയിരുത്തൽ.

കാർഷിക മേഖലയിൽ ഇത് തളർച്ച സൃഷ്ടിച്ചിട്ടുണ്ട് എന്ന് രഘുനാഥ് സമ്മതിക്കുമ്പോൾ കേരളത്തിലെ തൊഴിലാളികളുടെ ജീവിത നിലവാരം ഉയർത്തുന്നതിന് ഇത് സാഹചര്യമൊരുക്കിയെന്ന് അദ്ദേഹം അഭിപ്രായപ്പെടുന്നു. അതിലൂടെ ഇപ്പോഴത്തെ തലമുറക്ക് കൂടുതൽ മികച്ച വിദ്യാഭ്യാസം നൽകാൻ തൊഴിലാളികളെ പ്രാപ്തരാക്കി എന്ന് ഒരു മറുപക്ഷമുള്ളതായി രഘുനാഥ് കുട്ടിച്ചേർക്കുകയാണ്.

ഈ വാദഗതിയോട് സുനിതക്കും യോജിപ്പാണ്. ഇന്ന് കേരളത്തിലുണ്ടായ വിദ്യാഭ്യാസ മുന്നേറ്റത്തിന് തൊഴിലാളികളുടെ കൂലിവർധന ഒരു പരിധി വരെ സഹായകമായിട്ടുണ്ട് എന്ന് ഇരുവരും അംഗീകരിക്കുന്നു.

ചികിത്സയും ആരോഗ്യവും

അന്ന് ചികിത്സാ സൗകര്യങ്ങൾ കുറവായിരുന്നതിനാൽ ജില്ല ആശുപത്രിയെയാണ് എല്ലാവരും ആശ്രയിച്ചിരുന്നത്. പലരും അച്ഛന്റെ കൈയിൽ നിന്ന് ഡോക്ടർമാർക്കുള്ള കത്ത് വാങ്ങാൻ വീട്ടിൽ എത്തുന്ന രീതി ഉണ്ടായിരുന്നു. അച്ഛൻ കത്തിനൊപ്പം അവർക്ക് യാത്രാചെലവിനുള്ള പണംകൂടി കൊടുക്കാൻ നിർദേശിച്ചിരുന്നു. അന്നത്തെ ഡോക്ടർ വി.കെ. നാരായണ മേനോൻ രോഗികളെ സൗജന്യമായാണ് ചികിത്സിച്ചിരുന്നത്. ആ സാമൂഹിക പ്രതിബദ്ധത പുതിയ തലമുറക്ക് കൈമോശം വന്നതിൽ ദുഃഖമുണ്ട്.