ഡിഫൻസ് ഓഹരികൾ മിന്നുന്നു യുദ്ധം തുറന്നിട്ട നിക്ഷേപ സാധ്യതകൾ

ഡിഫൻസ് മേഖലയിലെ കമ്പനികൾക്ക് ഗംഭീരനേട്ടം കൊയ്യാനുതകുന്ന മൂന്നു ഘടകങ്ങളുണ്ട് ഇപ്പോൾ.

- സനിൽ എബ്രഹാം

ഇന്ത്യ പാക്കിസ്ഥാനെതിരെ നടത്തിയ ആക്രമണവും അതിന്റെ ആസൂത്രണവും ലോക ആയുധവിപണിയുടെ ശ്രദ്ധ നേടിയെടുത്തിരി ക്കുന്നു. അതോടൊപ്പം ഇന്ത്യൻ വിപണിയിൽ ലിസ്റ്റ് ചെയ്ത ഡിഫൻസ് ഓഹരികളിൽ വിദേശ നിക്ഷേപകരുടെ സവിശേഷ ശ്രദ്ധ പതിയുകയുമുണ്ടായി.

ഡിഫൻസ് മേഖലയിലെ കമ്പനികൾക്കു ഗംഭീരനേട്ടം കൊയ്യാനുതകുന്ന മൂന്നു ഘടകങ്ങളുണ്ട് ഇപ്പോൾ. ഒന്ന്, നമ്മുടെ ആയുധങ്ങളുടെ മികവ്. ഈ മേഖലയിലെ വിദഗ്ധരായ ഇസ്രയേലുമായിട്ടുള്ള കൂട്ടുകെട്ടുമൂലം ആയുധങ്ങളുടെ ടെക്നോളജിയിൽ ഇന്ത്യ വലിയ മുൻതൂക്കമുണ്ട്. അതു വലിയ കയറ്റുമതി സാധ്യതയാണു തുറക്കുന്നത്.

രണ്ട്, പൂട്ടിക്കെട്ടാനിരുന്ന ഡിഫൻസ് റിസർച്ച് ആന്റ് ഡെവലപ്മെന്റ് ഓർഗനൈസേഷന് രണ്ടാമതൊരു അവസരം നൽകിയപ്പോൾ അവർ തദ്ദേശീയമായി വികസിപ്പിച്ച പുതുനിര ആയുധങ്ങളുടെ വാണിജ്യ സാധ്യത.

മൂന്ന്, സപ്ലിമെന്ററി ബജറ്റിലൂടെ ഡിഫൻസിലേക്കു വരുമെന്നു പ്രതീക്ഷിക്കുന്ന 50,000 കോടി രൂപ. അഞ്ചു ട്രില്യൻ രൂപയ്ക്കടുത്തു വകയിരുത്തിയ ഫെബ്രുവരി ബജറ്റിനെ നിഷ്പ്രഭമാക്കി 2026 അവസാനിക്കുമ്പോൾ തന്നെ ഏകദേശം ഏഴു ട്രില്യൻ രൂപയുടെ പദ്ധതി വിഹിതത്തിലേക്കു രാജ്യം എത്തിയേക്കും

ഇന്ത്യ പാക്കിസ്ഥാനെതിരെ ആക്രമണം നടത്തിയ ആഴ്ചയിൽ ഓഹരിവിപണിയിൽ നിഫ്റ്റി ഇന്ത്യ ഡിഫൻസ് ഇൻഡക്സ് 17% കുതിച്ചുയർന്നു. ആവേശം പെട്ടെന്നു നേട്ടമുണ്ടാക്കാനുള്ള വ്യഗ്രതയാവരുതെന്ന മുന്നറിയിപ്പ് പല അനലിസ്റ്റുകളും നൽകുന്നുണ്ട്. മുൻനിരയിലെ അതിശക്തമായ ഓഹരികളിൽ ദീർഘകാലാടിസ്ഥാനത്തിൽ ഗുണമുണ്ടാവുമെന്നും മറ്റുള്ളവയിൽ നന്നായി പഠിച്ചു മാത്രമേ നിക്ഷേപിക്കാവു എന്നും ഇക്കൂട്ടർ പറയുന്നു.