ജഗദീഷിന്റേത് വേറിട്ട വഴികൾ ജീവിതത്തിലും മണി മാനേജ്മെന്റിലും

എന്നും മിഡിൽ ക്ലാസ് ജീവിതമാണ് ഞങ്ങളുടേത്

- 

ഓർത്തോർത്തു ചിരിക്കുന്ന സീനുകളിലൂടെ മലയാളികളുടെ മനസ്സിൽ ഇടം പിടിച്ച് സിനിമാ താരമാണ് ജദഗീഷ്. നാലു പതിറ്റാണ്ടിനിപ്പുറം, അടിമുടി മാറിയ മലയാള സിനിമയിൽ ന്യൂജെൻകാർക്കൊപ്പവും അപ്ഡേറ്റഡായി ഏറ്റവും സജീവമായി തുടരാനും അദ്ദേഹത്തിനു കഴിയുന്നു. അതും തികച്ചും വ്യത്യസ്തമായ ഭാവപ്പകർച്ചയോടെ.

സിനിമാതാരങ്ങൾക്കിടയിൽ ജീവിതരീതികൾ കൊണ്ടും ജഗദീഷ് വ്യത്യസ്തനാണ്. ഒന്നാം റാങ്കോടെ എംകോം, 22-ാം വയസ്സിൽ മികച്ച ജോലിയും സ്വന്തമാക്കി. ജീവിതത്തോടുള്ള കാഴ്ചപ്പാടിലും ഭക്ഷണ രീതികളിലും മണി മാനേജ്മെന്റിലും പിന്തുടരുന്ന രീതികളാകാം സിനിമാമേഖലയിലെ പലരും നേരിടുന്ന വിവിധ പ്രശ്നങ്ങളിൽ നിന്നും ഒഴിഞ്ഞുനിൽക്കാൻ അദ്ദേഹത്തെ പ്രാപ്തനാക്കുന്നതും. ബാല്യത്തിൽ ലഭിച്ച പരിശീലനവും ഉന്നത വിദ്യാഭ്യാസവും ഭാര്യ ഡോ. രമയുടെ പിന്തുണയുമെല്ലാം അതിന് അദ്ദേഹത്തിനു സഹായകമായി. അതേക്കുറിച്ചെല്ലാം സമ്പാദ്യത്തോടു സംസാരിച്ചതിന്റെ പ്രസക്ത ഭാഗങ്ങൾ ജഗദീഷിന്റെ വാക്കുകളിലൂടെതന്നെ ഇവിടെ വായിക്കാം...

വരുമാനത്തിനനുസരിച്ച് ജീവിക്കണം എന്ന ഒരു ചിന്തയാണ് നമുക്കെല്ലാം ആദ്യം വേണ്ടത്. അതിന് അത് വലിയ പ്ലാനിങ്ങോ വേറൊരാളുടെ ഉപദേശമോ ആവശ്യമില്ല. വരവിനനുസരിച്ച്, ഉള്ളതുകൊണ്ട് നന്നാ യി ജീവിക്കാൻ സ്വന്തം കോമൺസെൻസ് ഉപയോഗിച്ചാൽ മാത്രം മതി.

വരുമാനം എത്രയായാലും കൃത്യമായ ഒരു ചെലവാക്കൽ പദ്ധതി മനസ്സിൽ ഉണ്ടാകണം. സാമാന്യബുദ്ധി വച്ച് ചിന്തിച്ചാൽ അതു സാധ്യമാകും. വലിയ അഡ്വൈസറുടെ ആവശ്യമില്ല.

അടുത്തുള്ളവരെ അനുകരിക്കേണ്ട

വാഗൺ ആർ ആണ് എന്റെ വാഹനം. മക്കൾക്കു നല്ല വണ്ടിയൊക്കെ ഉണ്ട്. പക്ഷേ, എനിക്ക് മറ്റൊരു കാർ ഇല്ല. ഞാൻ ഇതിൽ തൃപ്തനാണ്. എന്റെ ജീവിത രീതി കണ്ട് ജഗദീഷ് പിശുക്കനാണെന്നു സിനിമാക്കാർക്കിടയിൽ ചിലർ പരിഹസിക്കുന്നുണ്ടാകാം. അതിൽ പരിഭവമോ വിഷമമോ ഇല്ല. എനിക്കു വേണമെന്നു തോന്നുന്നവയ്ക്ക് ഞാൻ ആവശ്യത്തിനു പണം മുടക്കുന്നു, സംതൃപ്തിയോടെ ജീവിക്കുന്നു.

വരുമാനം നോക്കാതെ, ലാവിഷ് ആയി, അടിച്ചു പൊളിക്കാൻ ആർക്കും സാധിക്കും. ബന്ധുവിന്റെയോ സുഹൃത്തുക്കളുടെയോ കല്യാണത്തിനു കടം വാങ്ങിയാലും വലിയ സമ്മാനം കൊടുക്കും. ഇല്ലാത്ത പണത്തിന് വലിയ വീടുകൾ പണിയും ഡെമോൺഷൻ ഇഫക്ടിനെക്കുറിച്ച് ഞാൻ പഠിപ്പിച്ചിട്ടുണ്ട്.