നിങ്ങൾക്കും കിട്ടും നിഫ്റ്റിയെക്കാൾ നേട്ടം

നിഫ്റ്റി 50 സൂചികയിലെ ഓഹരികളിൽ നിക്ഷേപിക്കുന്ന ഇടിഎഫിൽ എസ്ഐപി നിക്ഷേപം വഴി നേട്ടം വർധിപ്പിക്കാനുള്ള സ്മാർട്ട് തന്ത്രം

- ഡോ. കനകചന്ദ്രൻ സി.ആർ. അസി. പ്രഫസർ ഓഫ് കൊമേഴ്സ്, ശ്രീകൃഷ്ണ കോളജ്, ഗുരുവായൂർ

ഓഹരിവിപണി വലിയ നേട്ടങ്ങൾ കൈവരിക്കുമ്പോഴും അതിന്റെ പങ്കു ലഭിക്കാത്ത നിക്ഷേപകർ ഏറെയാണ്. കാരണം നഷ്ടസാധ്യത ഭയന്ന് അവർ ഓഹരിയിൽ നിന്ന് അകന്നുനിൽക്കുന്നതാണ്. അതിൽ ഒരു വിഭാഗം ഇപ്പോൾ മ്യൂച്വൽഫണ്ടുവഴി നേട്ടമെടുക്കുന്നുണ്ട്. ഇവിടെ, നിഫ്റ്റി 50 ഇടിഎഫിലൂടെ നഷ്ടസാധ്യത കുറച്ച് വിപണിയുടെ നേട്ടം പൂർണമായും ലഭ്യമാക്കാനുള്ള ഒരു മാർഗമാണ് വിശദീകരിക്കുന്നത്.

നിഫ്റ്റി 50 ഇടിഎഫിന്റെ മികവുകൾ

ലിക്വിഡിറ്റി എളുപ്പത്തിൽ പണമാക്കിമാറ്റാം. നിഫ്റ്റിയുടെ നേർചിത്രമായതിനാൽ സൂചികയുടെ അതേ നേട്ടം ഉറപ്പാണ്. ലഭ്യമായവയിൽനിന്ന് മെച്ചപ്പെട്ട ലിക്വിഡിറ്റിയും കുറഞ്ഞ എക്സ്പെൻസ് റേഷ്യോയുമുള്ള ഇടിഎഫ് തിരഞ്ഞെടുത്തു നേട്ടം കൂട്ടാം.

50 ഓഹരികൾ ഏറ്റവും മികച്ച 50 കമ്പനികളിലാണ് നിഫ്റ്റി50 ഇടിഎഫുകളുടെ നിക്ഷേപം. ഒരു ഓഹരിയിലോ, ഏതാനും ഓഹരിയിലോ നിക്ഷേപിക്കുമ്പോഴുള്ള നഷ്ടസാധ്യത ഗണ്യമായി കുറയ്ക്കാം.

മാർക്കറ്റ് വില മുൻദിവസത്തെ ക്ലോസിങ് വിലയിൽ (NAV) മാത്രമേ മ്യൂച്വൽഫണ്ട് വാങ്ങാൻ സാധിക്കുകയുള്ളൂ. എന്നാൽ ഓഹരികൾ പോലെ മാർക്കറ്റ് സമയത്തെ വിലയിൽ ഇടിഎഫ് വാങ്ങാം, വിൽക്കാം. മാർക്കറ്റ് ടൈമിലെ താഴ്ചകളെ വാങ്ങലിനായി കാര്യക്ഷമമായി ഉപയോഗിക്കാം എന്ന ഈ സാധ്യതയാണ് മ്യൂച്വൽ ഫണ്ടുകളെ അപേക്ഷിച്ച് ഇടിഎഫുകളെ കൂടുതൽ മികച്ചതാക്കുന്നത്.

ഇടിഎഫുകൾക്ക് ഇൻട്രാഡേ എൻ എ വി (INAV) ആണുള്ളത്. ഇക്വിറ്റി ഇടിഎഫുകളിൽ 15 സെക്കൻഡിന്റെ ഇടവേളകളിൽ ഐഎൻഎവി അപ്ഡേറ്റ് ചെയ്യപ്പെടും.

എന്താണ് തന്ത്രം?

ഇവിടെ വിശദീകരിക്കുന്ന നിഫ്റ്റി 50 ഇടിഎഫിലെ ഒരു മികച്ച ഇൻവെസ്റ്റ്മെന്റ് സ്ട്രാറ്റജിയിലൂടെ നിഫ്റ്റി സൂചികയെക്കാൾ മികച്ച നേട്ടം കൈവരിക്കാൻ സാധിക്കും. ഇതേ തന്ത്രം മിഡ് ക്യാപ്, സ്മാൾ ക്യാപ് ഇടിഎഫുകളിലും പിന്തുടരാവുന്നതാണ്.