ഇളക്കി, കുലുക്കി, പുതുക്കി ആരോഗ്യ ഇൻഷുറൻസ്

ഇൻഷുറൻസിനെ പോളിസിയുടമ സൗഹൃദമാക്കുന്ന മാറ്റങ്ങളാണ് നിലവിൽ വരാൻപോകുന്നത്. മുട്ടാപ്പോക്ക് ന്യായങ്ങൾ നിരത്തി ക്ലെയിം നിരസിക്കാൻ ഇനി കമ്പനികൾക്കാവില്ല.

- സി.എസ്.രഞ്ജിത്ത് പ്രമുഖ കോളമിസ്റ്റും വേൾഡ് ബാങ്ക് കൺസൽറ്റന്റുമാണ് ലേഖകൻ.

വളരെയധികം സംശയങ്ങളും പരാതികളും ഉയരുന്ന സാമ്പത്തിക സേവനമാണ് ആരോഗ്യ ഇൻഷുറൻസ്. ഇത്തരത്തിൽ വരുന്ന പരാതികൾക്കു പരിഹാരം കാണുന്നതിന് ഈ വർഷം മേയ്മാസത്തിൽ ഇൻഷുറൻസ് റെഗുലേറ്ററി ആന്റ് ഡെവലപ്മെന്റ് അതോറിറ്റി (ഐആർഡിഎഐ) തുടക്കം കുറിച്ചിരിക്കുകയാണ്. ഇതിന്റെ ഭാഗമായി ആരോഗ്യ ഇൻഷുറൻസിനെ പോളിസിയുടമ സൗഹൃദമാക്കുന്ന മാറ്റങ്ങളുമായി മാസ്റ്റർ സർക്കുലർ ഇറക്കിക്കഴിഞ്ഞു.

ക്ലെയിം നിരസിക്കലിനു കടിഞ്ഞാൺ

അസുഖം നേരത്തെ ഉണ്ടായിരുന്നതാണ്, മാനസിക രോഗത്തിനു പരിരക്ഷയില്ല, കിടത്തി ചികിത്സ ചെലവു നൽകാനാവൂ, കോക്ക്ടൈൽ വാക്സീൻ തുടങ്ങിയ നൂതന ചികിത്സാരീതികൾ കവറേജ് പരിധിയിൽ വരില്ല എന്നിങ്ങനെ കമ്പനികൾ നേരത്തെ തയാറാക്കിവച്ചിട്ടുള്ള സ്ഥിരം ഉത്തരങ്ങൾ കേട്ട് ഒട്ടുമിക്ക പോളിസിയുടമകളും ഞെട്ടിയിട്ടുണ്ടാകും. 60 വയസ്സു കഴിഞ്ഞവർക്ക് മെഡിക്കൽ പോളിസികൾ നൽകാൻ കമ്പനികൾക്കൊന്നും തന്നെ താൽപര്യമുണ്ടായിരുന്നില്ല ഇതുവരെ. ആ സ്ഥിതി മാറുകയാണ്.

രോഗികൾക്കും പ്രായമായവർക്കും കവറേജ്

എല്ലാവർക്കും പോളിസി കവറേജ് ഉറപ്പാക്കുകയാണ് റെഗുലേറ്ററുടെ ലക്ഷ്യം. അതിനായി ഏതു പ്രായക്കാർക്കും പോളിസി നൽകണം. മുൻപുണ്ടായിരുന്നതെന്നോ തീരാവ്യാധിയെന്നോ വ്യത്യാസമില്ലാതെ എല്ലാ ചികിത്സാ സമ്പ്രദായങ്ങളിലും കിടത്തിചികിത്സ, പകൽചികിത്സ, വീട്ടുചികിത്സ എന്നിവയ്ക്ക് പരിരക്ഷ നൽകുന്ന രീതിയിലുള്ള പോളിസികൾ ലഭ്യമാക്കണമെന്നാണ് ഇൻഷുറൻസ് കമ്പനികളോട് ഐആർഡിഎഐ സർക്കുലർ ആവശ്യപ്പെടുന്നത്. അതോടെ പ്രായം, ആരോഗ്യസ്ഥിതി, സവിശേഷ ആവശ്യങ്ങൾ എന്നിവയ്ക്കിണങ്ങുന്ന പോളിസികൾ നൽകാൻ ഇൻഷുറൻസ് കമ്പനികൾ ബാധ്യസ്ഥരായിരിക്കുന്നു.

നൂതന ചികിത്സാരീതികളെല്ലാം തന്നെ പരിരക്ഷാ പരിധിയിൽ ഉൾപ്പെടുത്തിയിരിക്കണം. മാനസികാരോഗ്യനിയമം, ശാരീരിക വൈകല്യങ്ങൾ സംബന്ധിച്ച നിയമം, എയ്ഡ് രോഗ നിയന്ത്രണ നിവാരണ നിയമം, വാടക ഗർഭധാരണ നിയമം തുടങ്ങിയവയിലെ വകുപ്പുകൾക്കു വിരുദ്ധമാകരുത് പോളിസികൾ.