ആരോഗ്യവും ബിസിനസും കുറയ്ക്കുന്ന വൈറ്റമിൻ 'ഐ' ഉപേക്ഷിക്കുക

ഉടമയെക്കൊണ്ട് ഞങ്ങൾക്കും ഞങ്ങളെക്കൊണ്ട് ഉടമയ്ക്കും ആവശ്യമുണ്ടെന്ന തോന്നൽ ജീവനക്കാർക്കിടയിൽ സൃഷ്ടിച്ചെടുക്കണം.

വിഖ്യാത ശാസ്ത്രജ്ഞനായ ആൽബർട്ട് ഐൻസ്റ്റീൻ ഒരു സൽക്കാരത്തിനിടയിൽ സുഹൃത്തുക്കളോടു പറഞ്ഞു, ഞാൻ പുതിയൊരു വൈറ്റമിൻ കണ്ടുപിടിച്ചു. സാധാരണ വൈറ്റമിൻ കുറഞ്ഞാൽ ആരോഗ്യത്തിനു ഹാനികരമാണല്ലോ. എന്നാൽ കുറയുന്തോറും ആരോഗ്യം വർധിപ്പിക്കും എന്നതാണ് ഈ വൈറ്റമിന്റെ പ്രത്യേകത. ഏതാണ് ആ വൈറ്റമിൻ എന്നു കൂട്ടുകാരെല്ലാം ആകാംക്ഷകൊണ്ടപ്പോൾ ഐൻസ്റ്റീൻ പറഞ്ഞു. വൈറ്റമിൻ ഐ. ഞാൻ എന്ന ഭാവംതന്നെ. 'ഐ'യെ സൂക്ഷിച്ചില്ലെങ്കിൽ അതു നമ്മെ ദുഃഖിപ്പിക്കും.

മറ്റുള്ളവരുടെ സ്നേഹവും പരിഗണനയും ആവശ്യമുള്ള ബിസിനസ് രംഗത്തിന്റെ കാര്യം പ്രത്യേകിച്ചു പറയേണ്ടതില്ല. ഉടമകൾ സ്ഥാപനത്തെ തന്റേതു മാത്രമായി കരുതി മുന്നോട്ടുപോയാൽ അന്നുമുതൽ തകർച്ചയിലേക്കുള്ള ദൂരം കുറഞ്ഞുവരും. ജോലിചെയ്യുന്ന സ്ഥാപനം തന്റേതുകൂടിയാണ് എന്ന് അവിടത്തെ ഓരോ തൊഴിലാളിക്കും ബോധ്യമാകുന്നിടത്തുനിന്നാണ് വളർച്ചയുടെ പടികൾ കയറിത്തുടങ്ങുക.