പുതിയ തൊഴിൽ നിയമം ശമ്പളം കുറയുമോ? കിട്ടുമോ ആഴ്ചയിൽ 3 അവധി?

രാജ്യത്ത് പുതിയ തൊഴിൽ നിയമങ്ങൾ നടപ്പിലാക്കാൻ ഗവൺമെന്റ് തയാറാകുന്ന പശ്ചാത്തലത്തിൽ ശമ്പള വരുമാനക്കാരെ ഇതെങ്ങനെ ബാധിക്കുമെന്നു പരിശോധിക്കാം.

- 

പാർലമെന്റ് പാസാക്കിയ പുതിയ നാലു ലേബർ കോഡുകളടക്കം രാജ്യത്ത് പുതിയ തൊഴിൽ നിയമം ഈ മാസം മുതൽ നടപ്പാക്കു മെന്നാണ് പ്രഖ്യാപിച്ചിരിക്കുന്നത്. കേരളം അടക്കം 23 സംസ്ഥാനങ്ങൾ ആവശ്യമായ നടപടികൾ പൂർത്തിയാക്കി വരുന്നു. അതെ, രാജ്യത്ത് പുതിയ തൊഴിൽ നിയമങ്ങൾ വരുകയാണ്. പക്ഷേ, ഇതു നടപ്പാക്കാനുള്ള ചട്ടങ്ങൾക്ക് അവസാനരൂപമായിട്ടില്ല എന്നു മാത്രം. അതുകൂടി വന്നെങ്കിലെ ചിത്രം വ്യക്തമാകൂ. എന്നാൽ, നരേന്ദ്ര മോദി സർക്കാരിന് പൊതുവേ കാര്യങ്ങൾ പെട്ടെന്നു നടപ്പാക്കി ഞെട്ടിക്കുന്ന രീതിയാണുള്ളത്. ഈ റിപ്പോർട്ട് തയാറാക്കുന്ന സമയത്തും നിയമം നടപ്പാക്കുന്ന തീയതി മാറ്റിയിട്ടുമില്ല. അതുകൊണ്ടു തന്നെ പുതിയ തൊഴിൽ നിയമം ഇപ്പോൾ നടപ്പാക്കി എന്നു വരാം. കൂടുതൽ വ്യക്തത വരുത്താനായി നീട്ടിവച്ചാൽ തന്നെ അടുത്ത സാമ്പത്തിക വർഷാരംഭത്തിലോ അടുത്ത ഒരു വർഷത്തിനകമോ നടപ്പാക്കും എന്നാണ്  ബന്ധപ്പെട്ടവർ നൽകുന്ന സൂചന. പുതിയ നിയമം തൊഴിൽരംഗത്ത് വിപ്ലവകരമായ മാറ്റങ്ങൾക്കു തുടക്കം കുറിക്കുന്നുവെന്ന് പറയുമ്പോഴും പല കാര്യങ്ങളിലും ഇപ്പോഴും വ്യക്തത ഇല്ലെന്നതും യാഥാർഥ്യമാണ്. എന്തായാലും പുതിയ നിയമം നടപ്പാകുന്നതോടെ രാജ്യത്തെ ഓരോ വ്യക്തിയെയും അത് ഏതെങ്കിലും തരത്തിൽ ബാധിക്കും. അവധി ദിവസങ്ങൾ കൂടും, കയ്യിൽ കിട്ടുന്ന ശമ്പളം കുറയും, ലീവ്, ഓവർ ടൈം എന്നിവയിൽ പുതിയ ചട്ടങ്ങൾ വരും എന്നിവയടക്കം പ്രചരിക്കുന്ന കാര്യങ്ങളുടെ യാഥാർഥ്യമെന്ത്? സർക്കാർ ജീവനക്കാർക്കു ബാധകമാകുമോ? സ്വകാര്യമേഖലയെ എങ്ങനെ ബാധിക്കും? ഏതുതരം സ്ഥാപനങ്ങൾക്കാണ് ഇതു നടപ്പാക്കാൻ ബാധ്യത? ഇതെക്കുറിച്ചാണ് ഈ ലക്കം കവർ സ്റ്റോറിയിൽ. കൃത്യമായ ചട്ടങ്ങൾ വന്ന ശേഷമേ എല്ലാറ്റിനും വ്യക്തത വരികയുള്ളൂ. എങ്കിലും, നിലവിൽ ലഭ്യമായ വിവരങ്ങളുടെ അടിസ്ഥാനത്തിൽ വരാവുന്ന മാറ്റങ്ങളെക്കുറിച്ചു മനസ്സിലാക്കാം.

ആഴ്ചയിൽ 4  ദിവസം ജോലി
കിട്ടുമോ 3  ദിവസം അവധി?

 

ദിവസം 12 മണിക്കൂർ ജോലി ചെയ്യണം, ആഴ്ചയിൽ മൂന്നു ദിവസം അവധി ലഭിക്കും എന്നീ റിപ്പോർട്ടുകളുടെ സത്യാവസ്ഥ എന്താണ്?

ആഴ്ചയിൽ നാലു ദിവസം ജോലി ചെയ്താൽ മൂന്നു ദിവസം അവധി എന്ന രീതിയാകും പുതിയ നിയമത്തോടെ പ്രാബല്യത്തിൽ വരികയെന്നാണ് റിപ്പോർട്ടുകൾ പറയുന്നത്..