ചില്ലുകൊട്ടാരം ആർക്കിടെക്ട് തോമസ് ഏബ്രഹാം

കിടപ്പുമുറിക്ക് അടക്കം ഗ്ലാസ് ഭിത്തികളുള്ള ബെംഗളൂരുവിലെ "ക്രിസ്റ്റൽ ഹാൾ എന്ന വീടിന്റെ വിശേഷങ്ങൾ...

- സിനു കെ. ചെറിയാൻ

കാഴ്ചക്കാരുടെ ഒഴുക്കാണ് ബെംഗളൂരു രാംപുരയിലെ "ക്രിസ്റ്റൽ ഹാൾ' എന്ന ചില്ലുകൊട്ടാരത്തിലേക്ക് രാജ്യത്തിനു പുറത്തു നിന്നുള്ള യൂട്യൂബർമാരും ബ്ലോഗർമാരും വരെ ദൃശ്യങ്ങൾ പകർത്താൻ അവസരം ചോദിക്കുന്നു. അറിയേണ്ടത് അകത്തും പുറത്തും ഗ്ലാസ് ഭിത്തികളുള്ള വേറിട്ട വീടിന്റെ വിശേഷങ്ങൾ. എല്ലാവർക്കും ഉത്തരം നൽകുന്നയാൾ മലയാളിയാണ് ചെ ങ്ങന്നൂർ സ്വദേശി ആർക്കിടെക്ട് തോമസ് ഏബ്രഹാം. ഗോര ഖ്പുർ ഐഐടിയിലെ ഉപരിപഠനത്തിനു ശേഷം ബംഗളുരു ആസ്ഥാനമായാണ് പ്രവർത്തനം. കൗതുകക്കാഴ്ചകൾക്കപ്പുറം ഗ്ലാസ് വീടിനു പിന്നിലെ ആശയങ്ങളും തത്വശാസ്ത്രവും കൂടി പരിചയപ്പെടുത്തുന്നതിലാണ് തോമസ് ഏബ്രഹാമിനു സന്തോഷം.

മനസ്സിലിടം പിടിക്കാത്ത കെട്ടിടങ്ങൾ

നിങ്ങളുടെ നാട്ടിലെ ഏറ്റവും മനോഹരമായ കെട്ടിടം ഏതാണ്? ലോകത്ത് എവിടെയുള്ള സാധാരണക്കാരനോട് ചോദിച്ചാലും അയാൾ ചൂണ്ടിക്കാട്ടുന്നത് പഴയ ഒരു നിർമിതി ആയിരിക്കും. മോഡേൺ ആർക്കിടെക്ചർ സാധാരണക്കാരന്റെ മനസ്സിലിടം പിടിക്കാത്തതിന്റെ കാരണങ്ങൾ തേടിയുള്ള അന്വേഷണത്തിനിടയിലാണ് "ക്രിസ്റ്റൽ ഹാൾ' എന്ന ആശയം ചിറകു വിരിക്കുന്നത്.

“തങ്ങളുടെ സൃഷ്ടികൾ അതീവ മനോഹരമാണെന്നാണ് മിക്കവാറും എല്ലാ ആർക്കിടെക്ടുമാരും വിശ്വസിക്കുന്നത്. പക്ഷേ, സാധാരണക്കാരനുമായി സംവദിക്കാൻ അവയ്ക്ക് കഴിയുന്നില്ല എന്നതാണ് യാഥാർഥ്യം. പരമ്പരാഗത വാസ്തു കലയുടെ സവിശേഷതകൾ എന്തെല്ലാമാണെന്നും ഇപ്പോൾ നമുക്ക് കൈമോശം വന്നത് എന്താണെന്നും വിലയിരുത്തിയാണ് ഈ കെട്ടിടം രൂപകൽപന ചെയ്തത്,'' തോമസ് ഏബ്രഹാം പറയുന്നു.