മാറി ചിന്തിക്കു ചെലവ് കുറയ്ക്കാം

വ്യത്യസ്തമായി ചിന്തിക്കുന്ന ചിലർ അവരുടെ ആശയങ്ങൾ ചെലവു നിയന്ത്രിച്ച് ഭംഗിയുള്ള വീട് സമ്മാനിക്കുന്നു

- സുനിത നായർ, ശ്രീദേവി

പെട്ടെന്ന് ഒരു സുപ്രഭാതത്തിൽ തീരുമാനമെടുത്ത് തുടങ്ങേണ്ട ഒന്നല്ല വീടുപണി. ഗുണമേന്മയും ഭംഗിയും കുറയാതെ, ചെലവു കുറച്ച് എങ്ങനെ വീടുപണിയാം എന്നു ചിന്തിക്കുന്നവരുടെയും, പ്ലാൻ ചെയ്ത് പണിയുന്നവരുടെയുമാണ് വരും കാലത്തെ നല്ല വീടുകൾ. ആശയങ്ങൾക്കായി മാസികകളെയും മറ്റു മാധ്യമങ്ങളെയും ആശ്രയിക്കാം. മികച്ച ആശയങ്ങളുള്ള ആർക്കിടെക്ടിനെ കണ്ടെത്താം. പക്ഷേ, ആ തിരച്ചിലും അല്പം സമയവും ക്ഷമയും ആവശ്യമുള്ളതാണ്. വ്യത്യ സ്തമായ കാഴ്ചപ്പാടുകളിലൂടെ ചെലവ് നിയന്ത്രിച്ച ചിലരുടെ അനുഭവങ്ങൾ ഇതാ...

കോട്ടയം വടവാതൂരിലെ ബൈജു വയലത്തിന്റെ വീട്ടിലെ കാർപോർച്ചാണിത്. പഴയ വീട് പൊളിച്ചു പണിതപ്പോൾ കിട്ടിയ ഓട്, തടിപ്പലകകൾ, ആന്റിക് വിപണിയിൽ നിന്നു വാങ്ങിയ കളർ ഗ്ലാസ്സ്... വ്യത്യസ്തമായ കാർപോർച്ച് ചുരുങ്ങിയ ചെലവിൽ നിർമിക്കാൻ ഇതെല്ലാമാണ് ബൈജു ഉപയോഗിച്ചത്. ഫയിമിനും പില്ലറിനും മെറ്റലും ഉപയോഗിച്ചു. പ്രകാശം അകത്തു കയറുമ്പോൾ തിളങ്ങുന്ന ഒറിജിനൽ കളർ ഗ്ലാസ്സിനു പകരം വയ്ക്കാൻ പുതിയ കളർ ഗ്ലാസ്സിനാകില്ല എന്നാണ് ബൈജുവിന്റെ പക്ഷം. കാർപോർച്ചിന്റെ ഭംഗി കൂട്ടാൻ പഴയൊരു ചക്രവും മാൻഡിവില്ല എന്ന വള്ളിച്ചെടിയും കൂട്ടിച്ചേർത്തു.

ജനലിനു മാത്രം സൺഷേഡ്

വീടിന് പുറംമോടി കൂട്ടാൻ കുറേ പൈസ ചെലവാക്കണോ? വേണ്ട എന്നാണ് കൊല്ലത്തെ ഇൻസൈറ്റ് ആർക്കിടെക്ചർ ഐഡിയാസിലെ റാസിമും അരുണും പറയുന്നത്. വീടിന്റെ ഉപയോഗവുമായി ബന്ധപ്പെട്ട ഏതെങ്കിലും ഘടകം തന്നെ സൗന്ദര്യാത്മകമാക്കി മാറ്റാം.

പഴയ തടിയും പഴയ കളർ ഗ്ലാസ്സും പഴയ ഓടും ഉപയോഗിച്ച് ജനലിന് നിർമിച്ച ഈ സൺഷേഡ് ആണ് തെളിവ്. ലിന്റൽ വാർക്കുന്നതിന് ഒപ്പംതന്നെ സൺഷേഡും വാർക്കുകയാണ് നമ്മുടെ നാട്ടിലെ പതിവ്. ചൂടിനെയും മഴയെയും തടയുക എന്നതു മാത്രമാണ് സൺഷേഡിന്റെ ധർമ്മം എന്നതു മറന്ന് ജനലിനു മുകളിൽ മാത്രമല്ലാതെ, വീടിനു ചുറ്റും സൺഷേഡ് കെട്ടുന്നത് വെറും പാഴ്ചെലവാണ്.

ജനലിന്റെ മുകളിൽ മാത്രം നിർമിക്കുന്ന ഇത്തരം ഷേഡുകൾ ചെലവു കുറയ്ക്കും; വീടിന്റെ ഭംഗിയും കൂട്ടും. തടിക്കു പകരം മെറ്റൽ ഫ്രെയിമിലും ഓട് വിരിക്കാം. വീടിന്റെ ശൈലി അനുസരിച്ച് ഓടിനു പകരം ഷിംഗിൾസോ സിമന്റ് ബോർഡോ വിരിച്ച് വ്യത്യസ്തമാക്കാം.