മിടുക്കൻ മിലൻ

രണ്ടു പഞ്ചായത്തുകളിലായി 150 ഏക്കർ കൃഷി ചെയ്യുന്ന ബംഗാളി യുവാവ് - മിലൻ ഷെയ്ക്ക് നെടുമ്പാശേരി, എറണാകുളം.

- 

"ചേട്ടാ, പഞ്ചസാരയിട്ട് രണ്ടു നാരങ്ങാവെള്ളം. ഒന്നിൽ അൽപം ഉപ്പുകൂടി ചേർത്തോ...' കൃഷിയിടത്തിലേക്കുള്ള വഴിയിലെ പെട്ടിക്കടയുടെ മുന്നിലെ ബഞ്ചിലിരുന്ന് തനി അങ്കമാലി മലയാളത്തിൽ മിലൻ ഷെയ്ക്ക് എന്ന ചെറുപ്പക്കാരൻ പറയുന്നതു കേട്ടാൽ അയാൾ മലയാളിയല്ലെന്നു വിശ്വസിക്കാൻ പ്രയാസം. ആ വഴി കടന്നുവരുന്ന നാട്ടുകാരോട് കുശലപ്രശ്നങ്ങളും കൃഷി വിശേഷങ്ങളുമൊക്കെ പറയുമ്പോൾ കൂടെയുള്ള ബംഗാളികളും പറയും, “മിലൻ മലയാളി തന്നെ'. ഈ നാടും നാട്ടുകാരുമായി അത്രത്തോളം ഇടകലർന്നു കഴിഞ്ഞു ബംഗാളിലെ മൂർഷിദാബാദ് സ്വദേശി മിലൻ ഷെയ്ക്ക്. ഇന്നത്തെ മലയാളിക്കില്ലാത്ത പല ശീലങ്ങളും പക്ഷേ ഈ "മലയാളിക്കുണ്ട്. മണ്ണിൽ പണിയെടുക്കാൻ മടിയില്ലെന്നത് ഒന്നാമത്തെ കാര്യം. കൃഷിക്കാരൻ എന്ന മേൽവിലാസത്തിൽ അഭിമാനിക്കുന്നുവെന്നത് രണ്ടാമത്തെ കാര്യം. കൃഷിയിൽ നിന്നു നല്ല ലാഭം നേടാനറിയാമെന്നതു മൂന്നാമത്തെ കാര്യം. അങ്ങനെയെങ്കിൽ, സലിംകുമാറിന്റെ കഥാപാത്രം പറയുംപോലെ നമ്മളൊക്കെ പറയേണ്ടിവരും; “ശരിക്കുള്ള ഞാനേ.... ഈ ഞാനല്ല. ആ ബംഗാളിയാണ്.

പാട്ടക്കൃഷിയുടെ പാഠങ്ങൾ

പത്താം ക്ലാസ് പരീക്ഷ കഴിഞ്ഞു നാട്ടിൽ വെറുതെയിരിക്കുമ്പോഴാണ്, കേരളത്തിൽ തൊഴിൽ ചെയ്യുന്ന സുഹൃത്ത് മിലനെ വിളിക്കുന്നത്. അങ്ങനെ മറ്റനേകം ബംഗാളി ചെറുപ്പക്കാരുടെ കൂട്ടത്തിൽ മിലനും ഇങ്ങോട്ടെത്തി. നെടുമ്പാശേരിയിൽ ഏക്കർ കണക്കിനു സ്ഥലം പാട്ടത്തിനെടുത്തു കൃഷി ചെയ്യുന്ന ഒരു കർഷകന്റെ കീഴിലാണ് തുടക്കത്തിൽ തൊഴിലെടുത്തത്. തുടർന്ന് മറ്റൊരു കർഷകനൊപ്പം. ഇരുവരും ഒന്നാന്തരം കൃഷിക്കാരായിരുന്നെന്ന് മിലൻ. നൂറും ഇരുനൂറും ഏക്കർ പാട്ടത്തിനെടുത്ത് കൃഷിചെയ്ത് മികച്ച വരുമാനമുണ്ടാക്കുന്ന അവർ തന്നെ മിലന്റെ മാതൃക. അവരിൽ നിന്നാണ് കൃഷിയുടെ ലാഭവഴികൾ സ്വായത്തമാക്കിയതെന്നും മിലൻ പറയുന്നു.