ജോലി കാവൽ, വരുമാനം ഏക്കറിന് 5 കോടി രൂപ

ഇത്തിരി വെള്ളം, ഇത്തിരി ചാണകം, കള നിക്കേണ്ട, മണ്ണിളക്കേണ്ട, വിളവെടുക്കാനും വിൽക്കാനും അക്കൗണ്ടിൽ കാശിടാനും സർക്കാർ - ദുരൈസ്വാമിയുടെ ചന്ദനക്കഷിയിലെ വിശേഷങ്ങൾ

- ജയിംസ് ജേക്കബ് തുരുത്തുമാലി

ലക്ഷങ്ങൾ നേടിത്തരുന്ന കൃഷിയെക്കുറിച്ച് പലരും പാളയത്തെ എം. കെ. ദുരൈസ്വാമി പറയുന്നത് ഒരു ഏക്കറിൽനിന്ന് 5-6 കോടി രൂപ കിട്ടാവുന്ന കൃഷിയെക്കുറി ച്ചാണ്. അതും മണ്ണിളക്കാതെ, കള പറിക്കാതെ, വളമിടാതെ ഒന്നിനു 40 രൂപ നിരക്കിൽ തൈകൾ വാങ്ങി നട്ടതാണ്. ഇത്തിരി വെള്ളവും ചാണകപ്പൊടിയും മാത്രം നൽകി. വിള വെടുക്കാൻ 15- 20 വർഷം കാത്തിരിക്കണമെന്നു മാത്രം.

വീടിനു ചുറ്റമുള്ള 40 ഏക്കറിൽ 35 ഏക്കറിലും കാടു പോലെ വളരുന്ന ചെറുമരങ്ങളാണ് ദുരൈസ്വാമിയുടെ വേറിട്ട കൃഷി. നട്ടിട്ടു 15 വർഷത്തിലേറെയായെങ്കിലും ശരാ ശരി 15-20 ഇഞ്ച് മാത്രം ചുറ്റളവുള്ള, തിരിച്ചറിയാത്തവർക്ക് വിറകിനു മാത്രം യോജിച്ചതെന്നു തോന്നുന്ന ചെറുമരങ്ങൾ സംശയിക്കേണ്ടാ, ദുരൈസ്വാമി നട്ടുവളർത്തുന്നതു ചന്ദനം തന്നെ. പത്തോ നൂറോ ആയിരമോ അല്ല പതിനായിരം ചന്ദനമരങ്ങൾ. കോടികൾ കായ്ക്കുന്ന കാശുമരങ്ങൾക്കു കാവലിരിപ്പാണ് സ്വാമിയുടെ ശരിക്കുമുള്ള പണി.

രണ്ട് ചന്ദനം പറമ്പിലുണ്ടെങ്കിൽ നിങ്ങൾക്ക് ഉറക്കം നഷ്ടപ്പെടുമെന്നുറപ്പ്. എത്ര ഉറക്കമിളച്ചാലും ഒരു ദിവസം ചന്ദനം നഷ്ടപ്പെടാനുള്ള സാധ്യത അതിലേറെ. അങ്ങനെയെങ്കിൽ പതിനായിരം ചന്ദനമരങ്ങൾ വളരുന്ന പറമ്പിനു നടുവിൽ ദുരൈസ്വാമി എങ്ങനെയാവും ഉറങ്ങുക? അതിനുളള വഴി അദ്ദേഹം തന്നെ കണ്ടെത്തിയിട്ടുണ്ട്. പാക്ക് അതിർത്തിയിൽ നുഴഞ്ഞു കയറുന്നവർ പോലും ഈ കൃഷിയിടത്തിലെത്താൻ കഷ്ടപ്പെടും. അത്ര ദുർഘടമാണ് സുരക്ഷാ വ്യൂഹം. രണ്ടു നിര മുള്ളുവേലികളാണ് അതിരിൽ. അതിനുള്ളിൽ വൈദ്യുതവേലി. പോരാത്തതിനു സിസി ടിവി ക്യാമറകളും. കന്നി ഇനത്തിൽപെട്ട വേട്ടനായ്ക്കളുടെ കാവൽ കൂടിയുള്ളപ്പോൾ ദുരൈസ്വാമിക്ക് ഉറങ്ങാം, സുഖമായി.