വെണ്ണപ്പഴത്തിൽ സംപ്രീതൻ

അവക്കാഡോക്കൃഷിയിൽ മാർഗനിർദേശങ്ങളുമായി യുവസംരംഭകനായ സംപ്രീത്

- 

നാട്ടിലെങ്ങും അവക്കാഡോ പ്രേമികളാണ്. ഗ്ലാമർ താരമായ ഹാസ് ഇനം മുതൽ നാടിനു ചേർന്നവരെന്നു വിശേഷിപ്പിക്കപ്പെടുന്ന ട്രോപ്പിക്കൽ അവക്കാഡോകൾ വരെ അവരുടെ അവകാശവാദങ്ങളിലുണ്ട്. പക്ഷേ, വേണ്ടത്ര പഠനവും നിരീക്ഷണവും നടത്താതെയാണ് പലരും സംസാരിക്കുന്നതെന്നു മാത്രം.

വയനാട് മീനങ്ങാടി സ്വദേശി കെ.ടി. സംപ്രീത് ഈ ഫലവൃക്ഷത്തിന്റെ സസ്യശാസ്ത്രവും പ്രവർധനരീതികളുമൊക്കെ ഏറെ ആഴത്തിലും പരപ്പിലും പഠിക്കാ നായി ഒട്ടേറെ വർഷങ്ങൾ ഉഴിഞ്ഞുവച്ചയാളാണ്. ജൈവ സാങ്കേതികവിദ്യയിൽ ബിരുദാനന്തരബിരുദം നേടിയ ശേഷം ഗവേഷണതാൽപര്യവുമായി നടക്കുമ്പോഴാണ് അവക്കാഡോ ഈ യുവകർഷകന്റെ ശ്രദ്ധയിൽപ്പെട്ടതും ഏറെ കൃഷിസാധ്യതയുള്ള വിളയെക്കുറിച്ച് കൂടുതൽ പഠിക്കാൻ തീരുമാനിച്ചതും. സമർപ്പണബുദ്ധിയോടെ നടത്തിയ പഠനത്തിന്റെ ഭാഗമായി കേരളത്തിനകത്തും പുറത്തുമുള്ള ഒട്ടേറെ കൃഷിയിടങ്ങൾ സന്ദർശിച്ച് അവിടെ വിളയുന്ന അവക്കാഡോയുടെ സവിശേഷതകൾ മനസ്സിലാക്കാൻ ശ്രമിച്ചു. ഉൽപാദനക്ഷമതയും മറ്റു മികവുകളുമുണ്ടെന്നു തോന്നിയ സെലക്ഷനുകൾ സ്വന്തമാക്കാനും സംപ്രീത് ഉത്സാഹിച്ചു. കൃഷിക്കാർക്ക് ഉപകരിക്കുന്ന മറ്റു വിളകളിലേ പഠനം വ്യാപിപ്പിക്കുകയാണ് ഇദ്ദേഹം ഇപ്പോൾ.