പടന്നമാക്കലെ പയ്യന്മാർ പണമുണ്ടാക്കിയ വഴികൾ

ലക്ഷങ്ങൾ മുടക്കാതെ ലക്ഷങ്ങൾ നേടുന്ന സഹോദരന്മാർ. സംരംഭങ്ങൾ: പന്നി, അലങ്കാരമത്സ്യം വളർത്തൽ

- മിഥുൻ പടന്നമാക്കൽ ഫിഷ് ഫാം, കടലാടിമറ്റം, പൂഞ്ഞാർ സൗത്ത് പി.ഒ., കോട്ടയം 9605530424

പടന്നമാക്കലെ പയ്യന്മാർ വേറെ ലെവൽ. വീടിനു ചുറ്റും ഓടിനടന്നാണ് അധ്വാനം. വെറുതെ കഷ്ടപ്പെടുകയല്ല, കൈ നിറയെ കാശുണ്ടാക്കുകയുമാണ്. കോട്ടയം ജില്ലയിൽ പൂഞ്ഞാറിനടുത്തുള്ള കുന്നോന്നിയിലെ നാട്ടുകാർ പറയുന്നത് അതിശയോക്തിയാണെന്നു കരുതേണ്ടാ. ഇരുവർക്കും പ്രായം മുപ്പതിൽ താഴെയെങ്കിലും കൊറോണക്കാലത്തെ മത്സ്യക്കൃഷിയും പന്നിവളർത്തലും നൽകിയ കരുത്തിൽ രണ്ടുനില വീട് പണിതു താമസമാക്കി. എല്ലാ നേട്ടത്തിനും പിന്നിൽ അപ്പന്റെയും വല്യപ്പന്റെയും പ്രചോദനവും പരിശീലനവുമെന്ന് മിഥുനും സച്ചിനും.

പന്നിക്കൂട് കഴുകാനും മീൻകുളത്തിൽ ചാടാനും മടിയില്ലാത്ത ഇവർക്ക് ഗസറ്റഡ് ഓഫിസറെയോ കോളജ് അധ്യാപകനെയോ മറികടക്കുന്ന വരുമാനമുണ്ട്. എന്നാൽ ലക്ഷങ്ങൾ മുടക്കിയുള്ള ടാങ്കുകളോ ഹൈടെക് സംവിധാനങ്ങളോ ഇല്ല. അടുത്ത കാലത്ത് സമൂഹമാധ്യമങ്ങൾ സൃഷ്ടിച്ചെടുത്ത ഫാം സങ്കൽപങ്ങളൊന്നും ഇവിടെ പ്രതീക്ഷിക്കരുത്. അലങ്കാരമത്സ്യ പ്രജനനമാണ് തുടക്കം മുതലേ ഈ ഫാമിലെ മുഖ്യ സംരംഭം. പ്രജനന ടാങ്കിലെ ഹാപ്പകളിലാണ് മത്സ്യക്കുഞ്ഞുങ്ങൾ വിരിഞ്ഞിറങ്ങുക. പിന്നീട് ഇവയെ 10 അടി വീതിയും 12 അടി നീളവും രണ്ടടി ആഴവുമുള്ള ചെറുടാങ്കുകളിലേക്കു മാറ്റി വളർത്തി വലുതാക്കുന്നു. ലാറ്റക്സ് സംഭരിക്കുന്ന വീപ്പ ചതുരാകൃതിയിൽ നിരത്തി മീതേ കനം കുറഞ്ഞ പടുത വിരിച്ചാണ് ഇവ നിർമിക്കുക. പരമാവധി 2000 രൂപ മാത്രം ചെലവ് വരുന്ന ഇത്തരം എഴുപതോളം ചെറു ടാങ്കുകളാണ് , അടിസ്ഥാനസൗകര്യം. ഓരോ ടാങ്കിൽ നിന്നും 2 മാസം കൂടുമ്പോൾ കുറഞ്ഞത് 15,000 രൂപയുടെ മത്സ്യക്കുഞ്ഞുങ്ങളെ ഇവർ വാരുന്നു. അപ്പോൾ മൊത്തം ടാങ്കുകളിൽ നിന്നുള്ള വരുമാനമെത്രെയെന്ന് ആലോചിച്ചുനോക്കൂ.ഏഞ്ചൽ ഫിഷ്, ഗപ്പി, പ്ലാറ്റി, സ്വോർഡ് ടെയിൽ, കോയി കാർപ്, ഫൈറ്റർ, പോളാർ പാ രറ്റ്, സീബ്ര എന്നിവയാണ് ഇവിടെ പ്രജനനം നടത്തുന്ന പ്രധാന അലങ്കാര മത്സ്യങ്ങൾ. മറ്റു പല ഇനങ്ങളെയും വാങ്ങി ചില്ലറ വിൽപന നടത്തുന്നുമുണ്ട്. ജയന്റ് ഗൗരാമി പ്രജനനം, വാള, തിലാപ്പിയ തുടങ്ങിയ വളർത്തുമത്സ്യങ്ങളുടെ വിൽപനയുമുണ്ട്.