കോഴിക്കോടിന്റെ ഹൃദയഗീതം

സിനിമാലോകം ബാബുരാജിനെ കൈവെടിഞ്ഞ കാലത്ത് ഞാനദ്ദേഹത്തെ തിരിച്ചുകൊണ്ടുവരാൻ ശ്രമിച്ചു. ‘യാഗാശ്വം' എന്ന സിനിമയ്ക്ക് പാട്ടൊരുക്കാൻ അദ്ദേഹം വീണ്ടുമെത്തി

- ഹരിഹരൻ

രണ്ടായിരാമാണ്ടിൽ ഞാൻ മലയാളം സിനി ടെക്നീഷ്യൻസ് അസോസിയേഷൻ (MACTA) ചെയർമാനായിരുന്ന കാലത്ത് സംഘടനയുടെ ധനശേഖരാർഥം കോഴിക്കോട്ടുവെച്ച് വിപുലമായ രീതിയിൽ ഒരു സംഗീതസംഗമം നടത്താൻ തീരുമാനിച്ചു. ഈ വിവരം എം.ടി. വാസുദേവൻ നായരുമായി ചർച്ച ചെയ്തപ്പോൾ മലബാറിൽ എവിടെയും നല്ലൊരു മ്യൂസിക് അക്കാദമി ഇല്ല, അതു കൊണ്ട് ഈ സന്ദർഭത്തിൽ അതുകൂടി സാധ്യമാക്കാൻ താൻ പരിശ്രമിക്കണമെന്ന് പറയുകയുണ്ടായി. അങ്ങനെ മാക്ടയുമായി ചർച്ച ചെയ്ത് തീരുമാനമെടുത്ത് സ്ഥാപിച്ചതാണ് ഈ അക്കാദമി. അളകാപുരിയിൽ കൂടിയ കമ്മിറ്റി മീറ്റിങ്ങിൽ ആദ്യം തീരുമാനിച്ച പേര് ‘മലബാർ മ്യൂസിക് അക്കാദമി എന്നായിരുന്നു. പിന്നീട് എന്റെ നിർബന്ധത്തിന് വഴങ്ങിയാണ് ബാബുരാജിന്റെ പേര് നൽകിയത്.

ബാബുരാജിന്റെ പേര് നൽകുന്നതിൽ പലർക്കും എതിർപ്പുണ്ടായിരുന്നു. പ്രത്യേകിച്ചും അന്തരിച്ച ടി. ദാമോദരൻമാസ്റ്റർക്ക്. മറ്റൊന്നും കൊണ്ടല്ല, നമ്മുടെ നാടിന്റെ സ്വഭാവം അദ്ദേഹത്തിന് നല്ലപോലെ അറിയാം എന്നതു കൊണ്ടാണ്. ഒരു വ്യക്തിയുടെ പേരുവയ്ക്കുമ്പോൾ അയാളുടെ ജാതി, മതം, രാഷ്ട്രീയം എല്ലാം ചർച്ചാവിഷയമാകാറുണ്ട്. മാസ്റ്റർ ദീർഘദർശനം ചെയ്തപോലെ അതൊക്കെ സംഭവിക്കുകയും ചെയ്തു. അതിനെക്കുറിച്ചൊന്നും ഇപ്പോൾ ഇവിടെ വിസ്തരിക്കുന്നില്ല. മറ്റൊരവസരത്തിലാവാം. ഏതായാലും ഇപ്പോൾ ആ വക പ്രശ്നങ്ങളില്ല.