உங்கள் வங்கிக் கணக்கை ChatGPT கிட்ட கொடுப்பீர்களா??

இக்கேள்விக்கு 'ஆம்' என்று பதிலளிப்பவர்களுக்காகப் புதிய வசதியொன்றை அறிமுகப்படுத்துகிறது ஒப்பன் ஏஐ.

- கே.எஸ்.குப்புசாமி

தனிநபர் நிதி (பர்ஸனல் ஃபைனான்ஸ்) மேலாண்மை என்பது நுணுக்கமானது. திறம்படக் கையாள்வது கடினம். இதை எளிதாக்குவதற்காக சாட்ஜிபிடி ஒரு வசதியைக் கொண்டுவருகிறது.

உங்களுடைய வங்கிக்கணக்குகளை சாட்ஜிபிடியாரிடம் கொடுத்துவிட வேண்டும். அத்துடன் தொடர்புடைய பிற கணக்குகளையும். அதாவது எந்தெந்த apps மூலம் நீங்கள் செலவுகள் செய்கிறீர்களோ அவற்றையும்.

அவ்வளவுதான். இனி ஆட்டோபைலட் மோட். நீங்கள் செலவு செய்யும் விதத்தை சாட்ஜிபிடி ஆராயும். எங்கெல்லாம் ஓட்டைகள் உள்ளனவென்று கண்டுகொள்ளும். பின்னர் உங்களிடம் சுட்டிக்காட்டும். சேமிப்பைக் கூட்டுவது எவ்வாறு என்று பாடம் நடத்தும். தாய்க்கிழவி போல.

சாதாரண சாட்ஜிபிடியிடமே நிதி நிர்வாகம் சார்ந்த கேள்விகளைக் கேட்கலாம். பதில் சொல்லும். ஆனால், இங்கே நான் குறிப்பிடுவது பதில்களல்ல, செயல்கள்.

ஓர் உதாரணம்.

அடுத்த இரண்டு ஆண்டுகளுக்குள் வீடு ஒன்றை வாங்க வேண்டும் என்று திட்டமிட்டுள்ளீர்கள். நம் சாட்ஜிபிடி பர்ஸனல் ஃபைனான்ஸியரிடம் சொல்லிவிட்டால் போதும். உங்கள் இலக்கை எவ்வாறு அடைவது என்று வழிகாட்டும்.