தூக்கமினமை ஒரு சர்வதேச நோய்!

‘நைட்டுல எவ்வளவு நேரம் புரண்டு படுத்தாலும் தூக்கமே வரல சார்.

- டாக்டர் எஸ்.சரத்குமார்

எனக்கு ஒரு தூக்க மாத்திரை கொடுங்க...’

இதைப் படித்தவுடன் முதியவர் ஒருவர், மருத்துவரிடம் உரையாடுவது போன்ற சித்திரம் உருவானால், நீங்கள் இன்னும் இவ்வுலகை சரியாகப் புரிந்து கொள்ளவில்லை என அர்த்தம்.

ஆம். இப்போதெல்லாம் ‘தூக்கமின்மை' முதியவர்களுக்கான பிரதான நோய் கிடையாது. அது எப்போதோ பள்ளி மாணவர்கள் வரை வந்துவிட்டது!

சமீபத்திய ஆராய்ச்சி ஒன்று பள்ளி மாணவர்களிடையே 40 சதவீதம் பேருக்கு தூக்கமின்மை ஒரு முதன்மையான சிக்கலாக இருக்கிறது என்பதை கோடிட்டுக் காட்டுகிறது. மேலும் மாணவர்களின் கல்வியை நேரடியாக இது பாதிக்கிறது எனவும் கூறுகிறது.

அதுசரி, உண்மையில் தூக்கமின்மை என்றால் என்ன?

தூக்கமின்மையை மருத்துவத்துறையில் 'இன்சோம்னியா' (Insomnia) என்கிறார்கள். அதனை ஒரு மனரீதியான சிக்கல் என்றே வகைப்படுத்துகிறார்கள்.

மனநலத்துறையின் கையேடான 'Diagnostic and Statistical Manual of Mental Disorders, Fifth Edition (DSM-5)', தூக்கமின்மையை இப்படி விவரிக்கிறது:

தூங்குவதில் சிரமம், தூக்கத்தை தொடர்வதில் சிரமம் அல்லது சீக்கிரமே விழித்துக் கொள்வது.

இம்மூன்றில் ஏதாவது ஒன்று, குறைந்தது 3 மாதங்களுக்கு நீடித்தால் அதுவே தூக்கமின்மையாகும்.

'மேயோ கிளினிக்' என்பது அமெரிக்காவில் அமைந்துள்ள உலகப்புகழ்பெற்ற மருத்துவ ஆராய்ச்சி நிறுவனம். இது மனிதனுக்குத் தேவையான சராசரி தூக்க அளவு குறித்து சமீபத்தில் ஒரு ஆய்வறிக்கை வெளியிட்டது.

அதன்படி, பதின் பருவ இளைஞர்கள் ஒவ்வொரு நாளும் எவ்வளவு மணிநேரம் தெரியுமா தூங்கவேண்டும்? எட்டு முதல் பத்து மணிநேரம் வரை!

ஆனால், இன்றைய இளைஞர்கள் அவ்வளவு நேரத்தை தூக்கத்திற்காக ஒதுக்குகிறார்களா?

'இல்லை' என்பதே கசப்பான உண்மை.

இன்றைய இளைஞர்கள் மின்னணு காலத்தில் வளர்ந்தவர்கள்; வாழ்கிறவர்கள். ஆன்லைன் கிளாஸில் ஆரம்பித்து 'ஆஃப்பாயில்' ஆர்டர் போடுவது வரை எல்லாமே ஒரு ஸ்மார்ட் போனில் அடங்கிவிடுவதால் இயல்பாகவே அவர்களுடைய ‘ஸ்கிரீன் டைம் (திரை நேரம்)' அதிகரித்திருக்கிறது.

‘ஸ்கிரீன் டைம்' என்பது ஒருவர் தினமும் செல்போன், கணினி, டிவி போன்ற மின்னணு சாதனங்களின் திரைகளை பார்க்கும் நேரத்தைக் குறிக்கிறது.