கேரளாவின் அச்சக் கிண்ணம்

ஒரு பக்கம் கண்ணுக்கு எட்டிய தூரம் வரை கழிமுகம், இன்னொரு பக்கம் கண்ணுக்கு எட்டிய தூரம் வரை நெல் வயல்கள் என ஓவியம் போல அழகாகக் காட்சியளிக்கிறது, குட்டநாடு.

- த.சக்திவேல்

கேரளாவின் தென்மேற்கு கடற்கரைப் பகுதியில் அமைந்திருந்தாலும், கேரளாவிலிருந்து பிரிந்து ஒரு தனித்தீவாக மிளிர்கிறது இந்த ஊர். 900 சதுர கிலோ மீட்டர் நிலத்தாலும், 1,100 சதுர கிலோமீட்டர் நீரினாலும், 500 சதுர கிலோமீட்டர் விவசாயத்தாலும் சூழப்பட்ட ஆச்சர்ய பூமி இது.

ஆலப்புழா, கோட்டயம், பந்தனம் திட்டா ஆகிய மூன்று மாவட்டங்களிலும் பரவியிருக்கிறது, குட்டநாடு. இதன் 57 சதவீத பரப்பளவு ஆலப்புழாவில்தான் இருக்கிறது.

குட்டநாட்டில் பம்பா, மீனாச்சில், அச்சன்கோவில், மணிமாலா என நான்கு நதிகள் பாய்கின்றன. இந்தியாவில் கடல் மட்டத்தை விட உயரம் குறைவான அரிய பகுதிகளில் குட்டநாடும் ஒன்று.

ஆம்; கடல் மட்டத்திலிருந்து -2.7 மீட்டர் உயரத்தில் இருக்கிறது, குட்டநாடு. உலகளவில் கடல் மட்டத்திலிருந்து குறைவான உயரம் கொண்ட பகுதிகளில் விவசாயம் நடப்பது அதிசயம்தானே? குட்டநாட்டில் நெல் விவசாயம் ஜோராக நடக்கிறது. இதுதான் குட்டநாட்டின் முக்கிய சிறப்பு.

‘கேரளாவின் அரிசிக் கிண்ணம்’ என்று குட்டநாட்டைப் புகழ்கின்றனர். இப்படி குட்டநாட்டின் சிறப்புகளைச் சொல்லிக்கொண்டே செல்லலாம்.

குட்டநாட்டில் எந்த பரபரப்பும் இல்லாமல் வாழ்க்கை மிக நிதானமாக நகர்கிறது. நகர்ப்புறங்களில் இருக்கும் வாகன நெரிசல்களோ, மாசுபாடான காற்றோ, இரைச்சலோ, மக்கள் கூட்டமோ இங்கே இல்லை. எங்கும் அமைதி; அமைதி மட்டுமே.

தேசிய நெடுஞ்சாலையைப் போல, தேசிய தண்ணீர் நெடுஞ்சாலையைக் கொண்ட ஓர் இடம் இது. ஓர் இடத்திலிருந்து, இன்னொரு இடத்துக்குச் செல்ல தண்ணீர் பாதையைத்தான் மக்கள் பயன்படுத்துகின்றனர்.