ரூ.10 கோடிக்கும் அதிகமாக வசூல் செய்த ஒலிவுட்டின் முதல் படம் இதுதான்..!

இன்றைய தேதியில் ஒடிசாவில் 116 திரையரங்குகள் மட்டுமே இருக்கின்றன.

- த.சக்திவேல்

இதில் சிங்கிள் ஸ்கிரீன் மற்றும் மல்டிபிளெக்ஸ் திரையரங்குகளும் அடக்கம்.

1999ம் வருடத்துக்கு முன்பு ஓடிசாவில் 300 சிங்கிள் ஸ்கிரீன்கள் இருந்தன. அந்த வருடத்தில் ஒடிசாவில் ஏற்பட்ட பயங்கர சூறாவளி பெருத்த சேதத்தை உண்டாக்கியது.

அந்தச் சூறாவளிக்குப் பிறகு சிங்கிள் ஸ்கிரீன்கள் குறையத் தொடங்கின. சிங்கிள் ஸ்கிரீன் திரையரங்குகளைத் திருமண மண்டபங்களாக மாற்றிவிட்டனர். இப்போது ஒடிசாவில் ஐம்பது சிங்கிள் ஸ்கிரீன் திரையரங்குகள் இருக்கின்றன.

ஒடிசாவில் திரையரங்குகள் குறைவாக இருப்பதால் அங்கே படங்களை வெளியிடுவதற்குத் திரையரங்கம் கிடைக்காமல் ஒடிசா திரைப்படத் துறை திணறுகிறது. அதனால் திரைப்படத்துறையில் முதலீடு செய்யவே பலர் தயங்குகின்றனர்.

பெரும்பாலும் லாபம் ஈட்டாத ஒரு துறையாக ஒடிசா திரைப்படத்துறை இருந்து வருகிறது. இத்தகைய ஒடியா சினிமாவில் நல்ல மாற்றங்களும் நடந்து வருகின்றன.

இதற்கு சமீப வருடங்களில் வெளியான ஒடியா படங்களே சாட்சி. இதற்கு முன்பு ஒடியா சினிமாவின் வரலாறும் முக்கியம்.

ஒடியா மொழி திரைப்படத் துறையை ஓலிவுட் என்று அழைக்கின்றனர். ஒடியா படங்களின் வரலாறு 1936ம் வருடத்திலிருந்தே ஆரம்பிக்கிறது.

மோகன் சுந்தர் டேப் கோஸ்வாமி இயக்கத்தில், 1936ம் வருடம் வெளியான ‘சீதா பிபாஹா’ தான் முதல் ஒடியா மொழிப் படம். இராமாயணத்தை அடிப்படையாகக் கொண்டது இப்படத்தின் கதை. காமபாலா மிஸ்ரா எழுதிய நாடகத்தை தழுவி இப்படத்தின் திரைக்கதை எழுதப்பட்டிருந்தது.