நடிக்காத படத்துக்கு இரு பாடல்களை விஜய் சேதுபதி எழுதியிருக்கார்!

டிவி பிரபலம் ராஜு நடித்துள்ள படம் ‘பன் பட்டர் ஜாம்'. இதன் கிம்பிள்ஸ் சமீபத்தில் வெளியாகி 'வேற லெவல்பா' எனுமளவுக்கு ரசிகர்களிடையே வைரலாகியுள்ளது.

- எஸ்.ராஜா

இதன் இயக்குநர் ராகவ் மிர் தத். ‘பாரம்’, ‘இஞ்சி இடுப்பழகி’ போன்ற படங்களுக்கு வசனம் எழுதிய இவர் ‘காலங்களில் அவள் வசந்தம்’ படத்துக்குப் பிறகு இந்தப் படத்தை இயக்கியுள்ளார்.

இந்தப் படத்தில் விஜய் சேதுபதி எழுதியுள்ள ‘ஏதோ பேசத் தானே...’ பாடல் பல மில்லியன் பார்வையாளர்களைச் சென்றடைந்துள்ளதால் படக்குழுவினரிடம் உற்சாகத்தைப் பார்க்க முடிந்தது. ரிலீஸ் வேலைகளில் பிசியாக இருந்த ராகவ்விடம் பேசினோம்.

‘பப் பட்டர் ஜாம்' என்ற டைட்டில் வழியாக என்ன சொல்லப் போறீங்க?

இது சீரியஸ்ஃபேமிலி டிராமா. சென்சிடிவ்வான விஷயத்தை சொல்வதாக இருந்தாலும் அதில் கொஞ்சம் நகைச்சுவை இருந்தால்தான் மக்களிடம் போய்ச் சேரும்.

உதாரணமாக 'டூரிஸ்ட் பேமிலி' படம் ஈழத் தமிழர்களின் வலியைச் சொல்லக்கூடிய சென்சிட்டிவ் படமாக வெளியாச்சு. ஆனால், அதை நகைச்சுவையாகவும் சொல்லியிருந்தார் கள். அது மாதிரி இந்தப் படமும் எமோஷனலான சென்சிட்டிவ் படமாக இருக்கும்.

சுருக்கமாக சொல்வதாக இருந்தால் நாம் கடந்தவைகளை நினைச்சு அதிகம் கவலைப்படுவோம். நிறையப் பேர் சிக்கலில் இருக்கிறார்கள் என்றால் அது அவர்களுக்கு வந்த பிரச்னைகளால் கிடையாது. பிரச்னை என்பது எல்லோர் வாழ்க்கையிலும் இருக்கிறது. ஆனால், பிரச்னைகளைப் பற்றிய கற்பனைகள் அவர்களை தூங்கவிடாமல் செய்கிறது.

ஒருத்தருக்கு காயம், மன வருத்தம் ஏற்படும் போது அந்த மன வருத்தம் ஒரு முறைதான் நடக்கும். அதாவது அந்த நிகழ்வின் போது மட்டும் தான் எதிர்த்தரப்பு மனவருத்தத்தைக் கொடுப்பார்கள்.

ஆனால், அதை காலம் முழுக்க சுமப்பது நாம். ஒரு தடவை திட்டியதை ரீவைண்ட் பண்ணி, ரீவைண்ட் பண்ணி மனசுல ஓட்டிட்டே இருப்பாங்க.

'மாநாடு' படத்துல வர்ற எஸ். ஜே.சூர்யா கேரக்டர் மாதிரி 'வந்தான், சுட்டான், ரிப்பீட்டு...' என்பதுபோல் எதிராளி என்ன செய்தான் என்பதை மனசுல ஓட்டிப்பார்த்துக்கொண்டே இருப்பாங்க.