இந்தியத் தேர்தல் வரலாறு!

சுதந்திரத்திற்குப் பிறகு இந்தியா பதினேழு தேர்தல்களைச் சந்தித்துள்ளது. இன்று நவீன வசதிகள் வந்தபோதும் தேர்தலை நடத்துவதில் அத்தனை சிக்கல்கள் இருக்கத்தான் செய்கின்றன.

- பேராச்சி கண்ணன்

ஆனால், அன்று முதல் தேர்தல் எப்படி நடந்திருக்கும்?

நினைத்துப் பார்க்கவே ஆச்சரியமாகத்தான் இருக்கிறது.

பிரதமராக இருந்த நேரு, முதல் தலைமைத் தேர்தல் ஆணையராக சுகுமார்சென் என்பவரை நியமித்தார். ஐசிஎஸ் அதிகாரியான அவர் மாகாணத் தேர்தல் ஆணையர்களை நியமித்து, வாக்காளர் பட்டியலை உருவாக்கி ஜனநாயகத் தேர்தலுக்கு வழிகாட்டினார். 1951 அக்டோபரில் தொடங்கி, 1952 பிப்ரவரி வரை முதல் பொதுத் தேர்தல் நடந்தது. அப்போதிலிருந்து இப்போது வரை நடந்துவரும் பொதுத் தேர்தல் பற்றிய குறிப்புகள் இங்கே...  

1

951-52- முதல் தேர்தல்

மொத்த வாக்காளர்கள்: 17,32,12343
பதிவான வாக்குகள்: 10,59,50083
வாக்கு சதவீதம்: 44.87%

மொத்தம் 26 மாநிலங்கள். 489 நாடாளுமன்ற மக்களவை உறுப்பினர்களுக்கான இடங்கள். இதுதவிர, நியமன உறுப்பினர்கள் 10 பேர் என 499 உறுப்பினர்கள். இதில் நியமன உறுப்பினர்கள் என்பவர்கள் ஜம்மு காஷ்மீரிலிருந்து 6 பேரும், ஆங்கிலோ இந்தியர்கள் 2 பேரும், அசாம் பழங்குடி பகுதியிலிருந்து ஒருவரும், அந்தமான் தீவுகள் சார்பாக ஒருவரும் நியமிக்கப்பட்டனர்.

அப்போது தொகுதிகள் ஒரு உறுப்பினர் தொகுதி, இரட்டை உறுப்பினர் தொகுதி, மூன்று உறுப்பினர் உள்ள தொகுதி எனப் பிரிக்கப்பட்டது. 

அதாவது, ஒரே தொகுதியிலிருந்து இரண்டு, மூன்று வேட்பாளர்கள் தேர்ந்தெடுக்கப்பட்டனர். அதாவது தாழ்த்தப்பட்ட மக்கள் அதிகமுள்ள தொகுதிகளில் பொது உறுப்பினர், தாழ்த்தப்பட்ட உறுப்பினர் என இருவர் தேர்வுசெய்யப்பட்டனர்.

மொத்தத் தொகுதிகள் 401. இதில் 314 தொகுதிகள் ஒரு வேட்பாளர் உள்ளவை. 172 தொகுதிகள் இரு வேட்பாளர்கள் கொண்டவை. ஒரு தொகுதி மட்டும் மூன்று வேட்பாளர்கள் உடையது. ஆக, மொத்தம் 489 இடங்கள். இதற்கு 1874 பேர் போட்டியிட்டனர். இதில், சுயேட்சைகள் மட்டும் 533 பேர். இதில் காங்கிரஸ் 364 இடங்களைப் பிடித்து பெரும்பான்மையுடன் ஆட்சியை அமைத்தது. அடுத்து இந்திய கம்யூனிஸ்ட் கட்சி 16 இடங்களைப் பிடித்தது. மொத்தமாக இந்தத் தேர்தலில் 53 கட்சிகள் பங்கெடுத்தன.