75 வயது மரங்களுக்கு பெண்சண்

அட... என புருவம் உயர்கிறதல்லவா? மேட்டரும் வாவ் ரகம்தான். மூத்த குடிமக்களுக்கு அல்லது அரசு வேலையில் இருந்து ஓய்வு பெற்றவர்களுக்கு வழங்கப்படும் ஓய்வூதியத்தைப் பற்றி நாம் கேள்விப்பட்டிருப்போம்.

- 

ஆனால், ஒரு பழமையான மரத்துக்கு கிடைக்கும் ஓய்வூதியத்தைப் பற்றி கேள்விப்பட்டிருப்போமா? ஒரு மரத்திற்கு ஓய்வூதியம் என்பது கண்டிப்பாக நம்மை வியப்பில் ஆழ்த்தும்.

அப்படிப்பட்ட ஒரு செயலைத்தான் பஞ்சாப்பின் அண்டை மாநிலமான அரியானாவில் அம்மாநில அரசு அரங்கேற்றியிருக்கிறது.

யெஸ். அங்கு 75 வயதுக்கு மேற்பட்ட மரங்களுக்கான ஓய்வூதியத் திட்டத்தை அரியானா அரசு கொண்டு வந்துள்ளது.

இந்த திட்டத்தின் பெயர் 'பிராண் வாயு தேவதா யோஜனா'. மரங்களைப் பராமரிப்பதே இத்திட்டத்தின் நோக்கம்.

குறைந்தபட்சம் 75 வயது நிரம்பிய மரங்கள் இத்திட்டத்தில் சேர்க்கப்படும் என வனத்துறை அதிகாரி தெரிவித்திருப்பது அம்மாநில மக்களை 'ஓ' போட வைத்திருக்கிறது.

'இத்திட்டம் முதல்வரால் கொண்டு வரப்பட்டு, அரியானா தினத்தன்று துவக்கி வைக்கப்பட்டது. இத்திட்டத்தின் கீழ், தனியார், பஞ்சாயத்து அல்லது வேறு எந்த இடத்திலும், 75 வயதுக்கு மேற்பட்ட பழமையான மரம் இருந்தால், அதற்கு மாதம் 2,750 ரூபாய் ஓய்வூதியம் வழங்கப்படும்..." என தெரிவித்திருக்கிறார்.

ரைட். எந்தெந்த மரங்கள் இத்திட்டத்தில் சேர்க்கப்பட்டுள்ளன? பழமையான மரங்களின் எண்ணிக்கை குறித்து அரியானாவில் கணக்கெடுப்பு நடத்தப்பட்டது. இது தவிர, பழமையான மரங்களை தங்கள் நிலத்தில் வைத்திருப்பவர்களிடம் இருந்து விண்ணப்பங்கள் பெறப்பட்டன.

அவர்கள் அந்த மரங்களை முறையாகப் பராமரித்து வந்தால் அரசாங்கம் அவர்களுக்கு ஓய்வூதியத்தை அளிக்கும்.