பிள்ளைப் பூச்சி

நீளமான வீட்டின் பின்புறத் தார்சாலில் பெரிய உரலில் பருத்திக் கொட்டை அரைத்துக் கொண்டிருந்தாள் ராசாத்தி.

- கலாப்ரியா

நான்கு கட்டுகள் தள்ளி, முதுகுக்குப் பின்னால் முன் வாசலில் யாரோ எதுவோ நிழலாடுவது போலிருந்தது. அவள் எப்போதுமே இந்த மாதிரி விஷயங்களில் கூர்மையானவள். பட்டாசலில் எல்லோருடனும் பேசிக் கொண்டோ தாயம் விளையாடிக் கொண்டேதான் இருப்பது போலிருக்கும். ஆனால் அடுத்த கட்டில் உள்ள மழைத்தண்ணீர் பிடித்து வைத்த பானைகள் ஒன்றிற்கு அடியில் எதுவோ விறுவிறுவென்று ஓடுவது போலத் தோற்றம் தெரியும்.

“என் ஆட்டையை நீ விளையாடு," என்று யாரிடமாவது தாயக்கட்டைகளைக் கொடுத்து விட்டு எழுந்து ஒரு வாரியலையும் எடுத்துக் கொண்டு பூனை போல் போவாள். வாரியலை சட்டென்று எடுக்கத் 'தோது'வாய் அதைச் சுவரில் சாத்தி வைத்து விட்டுப் படக்கென்று பானையைத் தூக்குவாள். அடியிலிருந்து பெரிய தேள் ஒன்று ஓடும். வாரியலை மாற்றிப் பிடித்துக் கொண்டு அதன் கொண்டையால் ஒரு போடு போடுவாள். தரையோடு நசுங்கிப் போயிருக்கும் தேள்.