చెడపకురా చెడదవు

చెడపకురా చెడదవు

- కథ • వివేక్ చక్రవర్తి

అనగనగా ఒక అడవి. ఆ అడవిలో జంపీ కోతి ఉండేవాడు. చాలా అమాయకమైనవాడు.

నమ్మకమైన వాడు కూడా. అడవిలో ఉన్న ఇతర జంతువులు తరచూ అతనిని ఇబ్బంది పెట్టడానికో, తలనొప్పుల్లోకి నెట్టడానికి సరదాగా ఆట పట్టించేవి.

“జాలీ, జాలీ, జంపీ నేనే!" అంటూ తన పాట పాడుకుంటూ జంపీ నడుస్తుంటే ఎవరో పిలిస్తే తిరిగి చూసాడు.

“జంపీ ఓ సహాయం చేస్తావా?” అని బాడీ నక్క గొంతు వినిపించింది.

జంపీ ఆశ్చర్యపోయాడు. “బాడీ నువ్వు నా సహాయం కోరుతున్నావా?" అని అన్నాడు.

“అవును! నేను అడగకూడదా? మనమంతా ఒకే అడవిలో జీవిస్తున్నాం కదా. ఒకరికి ఒకరం సహాయం చేయడమే సరికదా” అన్నాడు బాడీ.

“సరే, చెప్పు. నీకు ఏం సహాయం చేయాలి?” “జంపీ అక్కడ ఉన్న తోట నుండి కొన్ని మామిడి పళ్లను నా కోసం కాస్త కోసి పెట్టవా?” అన్నాడు బాడీ.

“మామిడి పళ్లా? కానీ బాడీ ఆ తోట జంబో ఏనుగు వాళ్లది. వారి చెట్ల నుండి ఎవరు పండ్లు కోసుకున్నా వాళ్లు ఊరుకోరని నీకు బాగా తెలుసుగా!" జంపీ ఆశ్చర్యంగా అన్నాడు.

“నా కడుపులో తీవ్రంగా నొప్పి ఉంది. నాకు మందు తయారుచేయడానికి ఆ మామిడి పండ్లు అవసరం!" అంటూ నాటకీయంగా బాధగా నటించాడు బాడీ.

“క్షమించు బాడీ, జంబో అనుమతి లేకుండా నేను పండ్లు కోయలేను" జంపీ మర్యాదగా చెప్పాడు.

బాడీ ఆవేదనతో గట్టిగా ఊపిరి తీసుకున్నాడు.

“అవును కదా! నేను చెడ్డవాడిని కాబట్టే ఎవరూ నాకు సహాయం చేయరు” అనుకున్నాడు.

“అలా కాదు బాడీ, కానీ జంబోను అడగకుండా...” “వదిలేయ్ జంపీ! గతంలో నేను చాలా తప్పులు చేసాను. అందుకే ఎవరూ నన్ను, నా మాటను పట్టించుకోరు" అన్నాడు బాడీ, తలను, కడుపు పట్టుకుని దూరం జరగసాగాడు.