நட்பின் வாக்குறுதி

பத்து வயது நிதேஷுக்கு அவனுடைய கிளி போபோ மீது அளவில்லா பாசம். போபோ அந்த வீட்டின் செல்லக்குட்டி. அவனுடைய கூண்டு முற்றத்தில் தொங்கிக் கொண்டிருந்தது; வீட்டுக்கு வருகிற ஒவ்வொருவரும் முதலில் அவனுக்கு ஹாய் சொல்லுவார்கள். பதிலுக்கு, போபோவும் ஒவ்வொருவரையும் பெரும் உற்சாகத்துடன் வரவேற்பான். நிதேஷின் அம்மா ரோஹிணி, அவனுக்கு சில வார்த்தைகளை கற்றுத்தந்திருந்தார். எனவே, யாராவது விருந்தினராக வந்தால், உடனே போபோ “ஹலோ!” என்று சொல்லி எல்லோரின் மனத்தையும் கவர்ந்து விடுவான்.

-  டாக்டர் கே. ராணி

நிதேஷும், போபோவும் ஆழமான நட்பில் இணைந்திருந்தனர். ஒவ்வொரு நாளும் பள்ளி முடிந்ததும், நிதேஷ் அவனருகில் உட்கார்ந்து பல மணி நேரம் பேசிக்கொண்டும் விளையாடிக்கொண்டும் இருப்பான். ஆனால் சமீபத்தில் அவன் கவனித்தது - போபோ பழையபடி மகிழ்ச்சியாக இல்லை. பேசுவதும் குறைந்து விட்டது; அவன் கூண்டின் கம்பிகளைத் தன் அலகால் கடிக்கத் தொடங்கியிருந்தான். இதனால் நிதேஷ் மிகவும் கவலைப்பட்டான். போபோ ஏன் இவ்வளவு சோகமாகவும் அமைதியில்லாமலும் இருக்கிறான் என்று அவனுக்கு புரியவில்லை. போபோ, முற்றத்தில் தானாக பறந்துவந்து தானியங்களைத் தின்றுக் கொண்டிருந்த சுதந்திரப் பறவைகளைப் பார்த்துக் கொண்டே இருந்தான். அவனுக்கும் அதுபோல் கூண்டை விட்டு வெளியேறி, திறந்த வானத்தின் கீழ் பறக்க வேண்டும் என்ற கனவு தோன்றியது.

ஒரு ஞாயிற்றுக்கிழமை, நிதேஷ் முழு நாளையும் போபோவுடன் கழிக்க முடிவு செய்தான். கூண்டருகே அமர்ந்து, “என்ன ஆச்சு போபோ? நீ மகிழ்ச்சியாக இல்லை போல?” என்று கேட்டான்.

போபோ ஒரு நிமிடம் அவனை நேராக பார்த்து, பின்னர் தன் தலையை கூண்டின் கம்பிகளுக்குள் நுழைக்க முயன்றான். அவன் வெளியே வரவே விரும்புகிறான் போல நிதேஷுக்கு தோன்றியது. வழக்கம் போல் விளையாடும் மனம்கூட அவனுக்கு இல்லை.

அடுத்த நாள் பள்ளியில், நிதேஷ் தன் கவலை நண்பன் லலித்திடம் பகிர்ந்தான்.

“போபோ இனிமேல் வீட்டில் இருக்க விரும்பவில்லை போலிருக்கு,” என்றான் லலித். “அப்படியா? ஆனால் அவன் எங்கே போகப்போகிறான்?” என்று கேட்டான் நிதேஷ். “ஒருமுறை அவனை விடுதலை செய்துவிட்டால், அவன் மரங்களில்தான் வாழ்வான் - மற்ற பறவைகள் போல்.”

“ஆனால் வெளியே பல அபாயங்கள் இருக்கின்றன. மேலும் அவன் என்னைவிட்டு பிரிந்து விட்டால், நான் எப்படி வாழ்வேன்?”

“சற்று யோசித்து பார். உனக்கு போபோ மகிழ்ச்சியாக இருக்கணுமா, சோகமாக இருக்கணுமா?” என லலித் மெதுவாக கேட்டான். “அவன் என் நண்பன். அவன் சோகமாக இருப்பதை என்னால் சகிக்க முடியாது. நான் என்ன செய்யலாம் லலித்?”

“அவனை விடுதலை செய்!”

“அப்படி செய்தால் வீட்டில் எல்லோரும் கோபப்படுவார்கள். நான் கண்டிப்பாக திட்டு வாங்குவேன்,” என்றான் நிதேஷ்.