ഇനി കാറിനു വില കൂടുമോ?

വാഹനവിപണിയെ ബാധിക്കുന്ന ബജറ്റ് തീരുമാനങ്ങൾ എന്തെല്ലാമെന്നു പരിശോധിക്കാം

- പിങ്കി ബേബി

വാഹനവിപണിയെ നേരിട്ടും അല്ലാതെയും ബാധിക്കുന്ന ഒട്ടേറെ പ്രഖ്യാപനങ്ങൾ കേന്ദ്ര ബജറ്റിലും സംസ്ഥാന ബജറ്റിലുമുണ്ടായി. ഇലക്ട്രിക് വാഹനങ്ങളുടെ നിർമാണത്തിനാവശ്യമായ 35 ഉൽപന്നങ്ങളുടെ കസ്റ്റംസ് തീരുവ കുറച്ചു കൊണ്ട് ഇവികൾക്കു വില കുറയുമെന്ന സൂചന കേന്ദ്രബജറ്റിൽ ധനമന്ത്രി നിർമല സീതാരാമൻ നൽകിയപ്പോൾ സംസ്ഥാന ധനമന്ത്രി ഇവി നികുതി കൂട്ടുമെന്നാണു പ്രഖ്യാപിച്ചത്. 12 ലക്ഷം രൂപ വരെ വരുമാനമുള്ളവരെ ആദായനികുതി പരിധിയിൽ നിന്നൊഴിവാക്കിക്കൊണ്ടുള്ള തീരുമാനമാകും ഒരുപക്ഷേ, രാജ്യത്തെ വാഹന വിപണിയിൽ ഇനി വലിയ ചലനമുണ്ടാക്കുക. നികുതിയൊഴിവാകുമ്പോൾ രാജ്യത്തെ മധ്യവർഗക്കാരുടെ പക്കൽ കൂടുതൽ പണമുണ്ടാകുകയും ഇതു വാഹനം ഉൾപ്പെടെയുള്ളവ വാങ്ങുന്നതിലേക്ക് അവരെ നയിക്കുകയും ചെയ്യാം. വാഹന വിപണിയെ ബാധിക്കുന്ന ബജറ്റ് തീരുമാനങ്ങൾ പരിശോധിക്കാം.

15 വർഷം കഴിഞ്ഞ വാഹനങ്ങൾക്ക് 50% അധികനികുതി

വാഹനവിലയെയും വിപണിയെയും നേരിട്ടു ബാധിക്കുന്ന കൂടുതൽ പ്രഖ്യാപന ങ്ങൾ സംസ്ഥാന ബജറ്റിലാണ്. 15 വർഷം കഴിഞ്ഞ സ്വകാര്യവാഹനങ്ങൾക്കു നികു തിയിൽ 50% വർധന ഏർപ്പെടുത്താനുള്ള തീരുമാനം യൂസ്ഡ് കാർ വിപണിയെ ബാധിക്കും. പഴയ വാഹനങ്ങളുടെ വിലയും ഡിമാൻഡും കുറയ്ക്കുന്നതാണ് തീരുമാനം. 15 വർഷം പിന്നിട്ട വാഹനങ്ങൾ പൊളിക്ക ണമെന്ന നയത്തിന് ആക്കം കൂട്ടുന്നതാണു ബജറ്റിലെ തീരുമാനം.15 വർഷം കഴിഞ്ഞ മോട്ടർ സൈക്കിൾ, സ്വകാര്യ ആവശ്യത്തി നുപയോഗിക്കുന്ന മുച്ചക്ര വാഹനങ്ങൾ, കാറുകൾ ഉൾപ്പെടെ എല്ലാ വാഹനങ്ങൾ ക്കും നികുതി വർധന ബാധകമാണ്. ഈ നികുതിയിലൂടെ 55 കോടി രൂപ യുടെ അധിക വരുമാനമാണ് സർക്കാർ പ്രതീക്ഷിക്കുന്നത്. സംസ്ഥാനത്തെ പല വാഹനപ്രേമികളും പഴയ ജീപ്പുകൾ ഉൾപ്പെടെ, പതിറ്റാണ്ടുകൾ പഴക്കമുള്ള ചില വാഹന മോഡലുകൾ ഇപ്പോഴും സൂക്ഷിക്കുന്നുണ്ട്. വിന്റേജ് കാർ കലക്ഷനുള്ളവർക്ക് ഇനി കൂടുതൽ തുക നികുതി നൽകേണ്ടിവരും.

ഇലക്ട്രിക് വാഹനങ്ങളുടെ നികുതി കൂട്ടി