ഹൈബ്രിഡ് ക്രൂസർ

 ഉയർന്ന ഇന്ധനക്ഷമതയും ഉഗ്രൻ പെർഫോമൻസുമായി ടൊയോട്ടയുടെ മിഡ്സ് ഹൈബ്രിഡ് എസ്യുവി - അർബൻ ക്രൂസർ ഹൈറൈഡർ

- നോബിൾ എം. മാത്യു

ഹൈബ്രിഡ് സാങ്കേതിക വിദ്യയുടെ കാര്യത്തിൽ അഗ്രഗണ്യരായ ടൊയോട്ടയിൽ നിന്ന് ഒരു ഹൈബ്രിഡ് എസ് യു   വി എത്തുമ്പോൾ പ്രതീക്ഷയ്ക്ക വകയില്ലേ? ഉണ്ട്. എന്നിരുന്നാലും ആശങ്കകൾക്കു കുറവില്ല. കാണാൻ എങ്ങനെ? നല്ല എടുപ്പുണ്ടോ? ഡ്രൈവ് ചെയ്യാനെങ്ങനെ? നല്ല കുതിപ്പുണ്ടോ? മൈലേജ് എങ്ങനെ? ഈ പറയുന്നതു കിട്ടുമോ? യാത്രാ സുഖമെങ്ങനെ? ഉലച്ചിലുണ്ടോ? എന്നിങ്ങനെ ഒട്ടേറെ ചോദ്യങ്ങളുമായാണ് ഹൈഡറിന്റെ ഡ്രൈവിങ് സീറ്റിലേക്കു കയറിയത്. കൊച്ചി നിപ്പോൺ ടൊയോട്ടയിൽ നിന്നു കർണാടകയിലേക്കാണ് സ്റ്റിയറിങ് തിരിച്ചത്. ഹൈവേയും ചുരങ്ങളും കാട്ടുവഴികളും മുന്നിൽ. ഹൈഡറിന്റെ ടെസ്റ്റ് ഡ്രൈവ് വിശേഷങ്ങളിലേക്ക്..

ഡിസൈൻ

എത്ര തിരക്കുപിടിച്ചുപോകുന്നവരും ഒന്നു നോക്കിപ്പോകുന്ന നീലനിറം. യാത്രയിലുടനീളം കൗതുകനോട്ടമാണു കണ്ടത്. ഒപ്പം, ഇതേത് മോഡൽ എന്ന സംശയവും. ഹൈഡർ നിരത്തിൽ താരമാകുന്നതേയുള്ളൂ. മുൻപേ നിരത്തിലെത്തിയ വിറ്റാരയ്ക്കൊപ്പം സ്വന്തം പാത തെളിച്ചു തുടങ്ങുന്നതേയുള്ളൂ.