வன்முறையை ஒடுக்க முப்படைகளுக்கு உத்தரவு

இலங்கையில் பலி 8-ஆக உயர்வு; அமைதி காக்க அதிபர் வேண்டுகோள்

கொழும்பு, மே 10:

இலங்கையில் வன்முறையை ஒடுக்கும் வகையில், பொதுச் சொத்துகளை சேதப்படுத்துவோர் மீது துப்பாக்கிச்சூடு நடத்த முப்படைகளுக்கு பாதுகாப்பு அமைச்சகம் செவ்வாய்க்கிழமை உத்தரவிட்டது.

இதற்கிடையே, திங்கள்கிழமை நடந்த வன்முறைக்கு பலியானோர் எண்ணிக்கை 8-ஆக அதிகரித்தது.

இலங்கையின் பொருளாதார நெருக்கடிக்குப் பொறுப்பேற்று அதிபர் கோத்தபய ராஜபட்ச, பிரதமர் மகிந்த ராஜபட்ச ஆகியோர் பதவி விலக வலியுறுத்தி பொதுமக்கள் நாடு தழுவிய போராட்டத்தில் ஈடுபட்டுள்ளனர். தலைநகர் கொழும்பில் அதிபர் அலுவலகம் அருகேயுள்ள காலிமுகத் திடலில் போராட்டத்தில் ஈடுபட்டிருந்தோர் மீது மகிந்த ராஜபட்சவின் ஆதரவாளர்கள் திங்கள்கிழமை திடீர் தாக்குதல் நடத்தினர். இதையறிந்து நாட்டின் பல்வேறு பகுதிகளில் மகிந்தவின் ஆதரவாளர்கள் மீது போராட்டக்காரர்கள் பதில் தாக்குதலில் ஈடுபட்டனர்.

இதைத் தொடர்ந்து, மகிந்த ராஜபட்சபிரதமர் பதவியை ராஜிநாமா செய்வதாக அறிவித்தார். ஆனாலும், வன்முறையை நிறுத்த முடியவில்லை. அம்பந்தோட்டாவில் உள்ள ராஜபட்ச சகோதரர் களின் தந்தை நினைவிடம், வீடு, குருநாகலில் உள்ள மகிந்தவின் வீட்டுக்கு போராட்டக்காரர்கள் தீவைத்தனர். மேலும் 14 முன்னாள் அமைச்சர்கள், 18 எம்.பி.க்கள், ராஜபட்ச குடும்பத்தின் ஆதரவு தலைவர்களின் வீடுகள் தாக்கப்பட்டன.

கொழும்பு மற்றும் பிற பகுதிகளில் நடந்த வன்முறையில் சுமார் 250 பேர் காயமடைந்தனர். ஆளும் கட்சி எம்.பி. அமரகீர்த்தி அதுகொரலா உள்பட 4 பேர் உயிரிழந்த நிலையில், பலி எண்ணிக்கை 8-ஆக அதிகரித்தது.

துப்பாக்கிச்சூடு நடத்த உத்தரவு: இந்நிலையில், வன்முறைக்குப் பின்னர் முதல் முறையாக மக்களுக்கு வேண்டுகோள் விடுத்து அதிபர் கோத்தபய ராஜபட்ச ட்விட்டரில் செவ்வாய்க்கிழமை வெளியிட்ட பதிவில், 'பொதுமக்கள் அமைதிகாக்கும் படியும், குடிமக்களுக்கு எதிரான வன்முறை மற்றும் பழிவாங்கும் செயல்களை நிறுத்தும்படியும் கேட்டுக்கொள்கிறேன். அரசியல் மற்றும் பொருளாதார பிரச்னைகளுக்கு தீர்வுகாண அனைத்து நடவடிக்கைகளும் எடுக்கப்படும்' எனத் தெரிவித்துள்ளார்.