പേരിൽ രാമൻ പ്രവൃത്തിയിൽ രാവണൻ

ഇന്ത്യ മുഴുവൻ ഉറ്റുനോക്കുന്ന വയനാട്ടിൽ ഇന്ദിരാ ഗാന്ധിയുടെ ചെറുമകൻ രാഹുൽ ഗാന്ധി മത്സരിക്കുന്ന മണ്ഡലത്തിലാണ് കോൺഗ്രസിന്റെയും ലീഗിന്റെയും കൊടികൾ ഉപേക്ഷിച്ച് ബലൂണുകൾ പറത്തിയത്

- എസ്. ജഗദീഷ് ബാബു: 9447077980)

അവസാന ശ്വാസം വരെയും രാജ്യത്തിനായി പോരാടുമെന്ന് പ്രസംഗിച്ച് മണിക്കൂറുകൾ കഴിയും മുൻപ് സുരക്ഷാഭടൻമാരാൽ കൊല്ലപ്പെട്ട ഇന്ദിരാഗാന്ധി. ആ രക്തസാക്ഷിയുടെ പിന്മുറക്കാർ കോൺഗ്രസ് കൊടി ഉയർത്താൻ പോലും ഭയപ്പെടുന്ന തിരഞ്ഞെടുപ്പ്.

ഇന്ത്യ മുഴുവൻ ഉറ്റുനോക്കുന്ന വയനാട്ടിൽ ഇന്ദിരാ ഗാന്ധിയുടെ ചെറുമകൻ രാഹുൽ ഗാന്ധി മത്സരിക്കുന്ന മണ്ഡലത്തിലാണ് കോൺഗ്രസിന്റെയും ലീഗിന്റെയും കൊടികൾ ഉപേക്ഷിച്ച് ബലൂണുകൾ പറത്തിയത്. ലോകത്തു തന്നെ ഒരു കുടുംബത്തിൽ പ്രധാനമന്ത്രിമാരായിരുന്ന രണ്ടുപേർ, അതും അമ്മയും മകനും രക്തസാക്ഷികളായിട്ടില്ല. ആ നെഹ്റു കുടുംബത്തെ കടന്നാക്രമിക്കുന്ന മോദിയെയും ബിജെപിയെയും ഭയപ്പെട്ടാണ് കോൺഗ്രസിന്റെ ആത്മാവിന്റെ ഭാഗമായ പതാകയില്ലാതെ രാഹുൽ ഗാന്ധി വയനാട്ടിൽ റോഡ് ഷോ നടത്തിയത്. മുസ്ലീംലീഗിന്റെ കൊടികൾ പറന്ന കഴിഞ്ഞ തിരഞ്ഞെടുപ്പിലെ ദൃശ്യങ്ങൾ കാണിച്ച് പാകിസ്ഥാൻ കൊടികൾ എന്ന് ആരോപിച്ചതാണ് കൊൺഗ്രസിനെ ഭയപ്പെടുത്തുന്നത്.

കൊടികൾക്ക് പകരം പ്ലക്കാർഡും ബലൂണും മതിയെന്ന തീരുമാനം കൈക്കൊണ്ട് കോൺഗ്രസ് പാർട്ടി എടുത്ത തീരുമാനം ചരിത്രപരമായ മണ്ടത്തരമാണ്. ദേശീയ പ്രസ്ഥാനത്തിന്റെ ഭാഗമായിരുന്ന ലീഗുമായി ഭരണം പങ്കുവെച്ച വരാണ് ബിജെപിയുടെ പൂർവ്വികരായ ജനസംഘക്കാർ. അവരാണ് ഇന്ത്യൻ യൂണിയൻ മുസ്ലീം ലീഗുമായുള്ള കോൺഗ്രസിന്റെ ഐക്യത്തെ അധിക്ഷേപിക്കുന്നത്.