કૃષ્ણનું કામણ અને કૌતુક

ગોપીઓની ફરિયાદ વિશે સંવેદનશીલ હોવા છતાં પ્રેમાગ્રહને છોડી ધર્માગ્રહને સાચવવાની જવાબદારી કૃષ્ણએ સ્વીકારવી પડી, અન્યથા રાધાનો સ્નેહ છોડી રાજ્યનો ભાર વહન કરવાનું શું કામ પસંદ કરવું પડે!

- હિતેન આનંદપરા

મન મીરાં ને તન રાધા થૈ કુંજકુંજમાં ઘૂમે

નીરખી શ્યામલ ડાઘ ચંદ્રના કિરણ-કિરણને ચૂમે.

                                            – અબ્બાસઅલી તાઈ ‘અજનબી’

કૃષ્ણ માત્ર ભગવાન નથી, એ સખા પણ છે. એની સાથે આપણે સહજતાથી વાત તો શું, વાદ-વિવાદ પણ કરી શકીએ. એની સામે રુસણાં પણ લઈ શકીએ અને રુદિયાની સરવાણી વહેતી પણ કરી શકીએ.

કૃષ્ણકાવ્યોની રચના દ્વારા હજારો કવિઓએ કૃષ્ણકૌતુકને પામવાનો પ્રયત્ન કર્યો છે. માધવ રામાનુજ રોકડું પરખાવતાં કહે છેઃ

ગોકુળમાં કો’કવાર આવો તો કાન હવે રાધાને મુખ ના બતાવશો; ગાયોનું ધણ લઈને ગોવર્ધન જાવ ભલે, જમનાને કાંઠે ના આવશો.