અલવિદા તબસ્સુમ..

આજે કોમેડિયન તરીકે બોલિવૂડ પર રાજ કરતા જોની લીવરને સ્ક્રિન પર લાવનાર પણ તબસ્સુમ જ હતાં

- હેતલ રાવ

બચપન કે દિન ભૂલા ના દેના.. આજ હંસે કલ રુલા ન દેના..' ગીતથી બાળપણથી જ જાણીતાં બનેલાં દિગ્ગજ અભિનેત્રી તબસ્સુમ હવે આપણી વચ્ચે નથી, પરંતુ તેમની અઢળક યાદો આજે પણ ચાહકોના દિલમાં જીવંત છે. તેમની ઓળખ તેમનું કામ હતું. ‘છોટી નરગિસ’ અને ‘છોટી મીના કુમારી' બનીને બોલિવૂડમાં બાળ કલાકાર તરીકે કામ કરવાનું શરૂ કર્યું. ૨૧ વર્ષ સુધી ભારતીય ટીવીનો પ્રથમ ટોક શો હોસ્ટ કર્યો. લોકપ્રિય સામયિકનાં સંપાદક રહ્યાં. ફિલ્મ પણ બનાવી. યુ-ટ્યૂબ પર ચેનલ શરૂ કરી, જેમાં વીતેલા દિવસોની સોનેરી યાદો વાગોળતા હતાં. આ હતાં તબસ્સુમ, જેમણે ૧૮ નવેમ્બરે દુનિયાને અલવિદા કહ્યું ને પોતાની પાછળ યાદોની ફૂલવાડી છોડી ગયા.

તબસ્સુમનો જન્મ ૧૯૪૪માં મુંબઈમાં થયો હતો. તેમના પિતાનું નામ અયોધ્યાનાથ સચદેવ અને માતાનું નામ અસગરી બેગમ હતું. તબસ્સુમનાં માતા-પિતા ભારતીય સ્વાતંત્ર્ય સેનાની હતા. તેમની માતા અસગરી બેગમ તો પત્રકાર અને લેખક પણ હતાં. તબસ્સુમ પોતાના નામના કારણે પણ ખૂબ ચર્ચિત બન્યાં હતાં. પિતાએ તેમની પત્નીની ધાર્મિક લાગણીઓને ધ્યાનમાં રાખીને તેમનું નામ તબસ્સુમ રાખ્યું છે, જ્યારે માતાએ પતિની ધાર્મિક લાગણીઓને ધ્યાનમાં રાખીને તેમનું નામ કિરણ બાલા રાખ્યું હતું. લગ્ન પહેલાંના દસ્તાવેજો અનુસાર તેમનું સત્તાવાર નામ કિરણ બાલા સચદેવ છે.