അദ്ഭുതപ്രതിഭാസം

“ഓർമകൾ ഉണ്ടായിരിക്കണമെന്ന് പലരോടും അഭ്യർഥിക്കേണ്ട കാലഘട്ടത്തിലാണ് നമ്മൾ ജീവിക്കുന്നത്. എന്നാൽ, കമൽഹാസന് ആ ഉപദേശം ആവശ്യമില്ല. ഓർമകളെ താലോലിക്കുന്ന വ്യക്തിത്വമാണ് കമലിന്റേത്.

-  ശ്രീകുമാരൻ തമ്പി

മലയാളസിനിമയിലെ നിത്യവസന്തമായിരുന്ന പ്രേംനസീറും ഉലകനായകൻ' എന്ന് പുകഴ്ത്തി തമിഴ് ജനത ആരാധിക്കുന്ന കമൽഹാസനും  ഒരേയൊരു സിനിമയിൽ മാത്രമേ ഒരുമിച്ചഭിനയിച്ചിട്ടുള്ളൂ. ആ മലയാളചിത്രത്തിന്‌ കഥയും തിരക്കഥയും സംഭാഷണവും ഗാനങ്ങളുമെഴുതി സംവിധാനം ചെയ്യാന്‍ എനിക്കാണ്‌ ഭാഗ്യമുണ്ടായത്‌. എറണാകുളം സ്വദേശിയായ കെ.പി. മോഹന്‍ വന്ദന” എന്ന ബാനറില്‍ നിര്‍മിച്ച തിരുവോണമാണ്‌ പ്രസ്തുതചിത്രം. എല്ലാ തിരുവോണദിനത്തിലും മലയാളികള്‍ മുടങ്ങാതെ കേള്‍ക്കുന്ന ഇഷ്ടഗാനമായ തിരുവോണപുലരി തന്‍ തിരുമുല്‍ക്കാഴ്ച വാങ്ങാന്‍ തിരുമുറ്റമണിഞ്ഞൊരുങ്ങി” എന്ന ഗാനം ഈ സിനിമയിലുള്ളതാണ്‌. ആ ത്രിസന്ധ്യ തന്‍ അനഘമുദ്രകള്‍ ആരോമലേ നാം മറക്കുവതെങ്ങനെ എത്ര സുന്ദരി, എത്ര പ്രിയങ്കരി എന്റെ ഹൃദയേശ്വരി...' എന്നീ ഗാനങ്ങളും തിരുവോണത്തിലുള്ളവയാണ്‌.

 നിര്‍ഭാഗ്യവശാല്‍ ഈ സിനിമയുടെ നെഗറ്റീവ്‌ ചെന്നൈയിലെ ആര്‍.കെ.ലബോറട്ടറി എന്ന സ്ഥാപനത്തിന്റെ ഉത്തരവാദിത്വക്കുറവ്‌ മൂലം ഉരുകിനശിച്ചു. സിനിമയുടെ ഫിലിം നെഗറ്റീവുകള്‍ എയര്‍ക്കണ്ടീഷന്‍ ചെയ്ത മുറികളില്‍ വേണം സൂക്ഷിക്കാന്‍. അങ്ങനെ ചെയ്യാത്തതിനാല്‍ തിരുവോണം' അടക്കം അനവധി മികച്ച മലയാളചിത്രങ്ങളുടെ നെഗറ്റീവുകള്‍ നഷ്ടപ്പെട്ടു. ഈ കൂട്ടത്തില്‍ ഞാന്‍ നിര്‍മിച്ച നാലു സിനിമകളുടെ നെഗറ്റീവുകളും ഇല്ലാതായി. ഒരിക്കലും പരിഹരിക്കാന്‍ കഴിയാത്ത നഷ്ടം. അക്കാലത്ത്‌ ചിത്രങ്ങള്‍ ഫിലിമില്‍ നിന്ന്‌ വീഡിയോയിലേക്കു പകര്‍ത്തുന്ന രീതി പ്രാബല്യത്തില്‍ വന്നിരുന്നില്ല. തിയേറ്ററുകളില്‍ പ്രദര്‍ശിപ്പിച്ച ഫിലിം പ്രിന്റുകളും അവശേഷിച്ചിരുന്നില്ല. പിന്നീട്‌ ആ ലബോറട്ടറി തന്നെ ഇല്ലാതായി. ചെന്നൈയില്‍ ആര്‍.കെ.ലബോറട്ടറി സ്ഥിതി ചെയ്തിരുന്ന സ്ഥാനത്ത്‌ ഇന്ന്‌ ഉയര്‍ന്നുനില്‍ക്കുന്നത്‌ ഒരു ത്രീസ്റ്റാര്‍ ഹോട്ടലാണ്‌, ഹോട്ടല്‍ ആദിത്യ,