ജെൻ സി താത്പര്യം ട്രേഡിങ്ങിൽ

സമ്പത്തു കാലത്തു നടുന്ന തൈകളാണു നിക്ഷേപങ്ങൾ. വരുമാനം എങ്ങനെ സുരക്ഷിതമായ നിക്ഷേപമാക്കാം എന്നു ചിന്തിക്കുന്നവർക്ക് മാർഗനിർദേശങ്ങൾ നൽകുന്ന പംക്തി...

- നിഖിൽ ഗോപാലകൃഷ്ണൻ സിഇഒ, പെന്റാഡ് സെക്യൂരിറ്റീസ്

മുൻ തലമുറ അധികം താത്പര്യം പ്രകടിപ്പിച്ചിട്ടില്ലാത്ത ട്രേഡിങ്ങിലേക്കാണ് പുതുതലമുറയുടെ നോട്ടം. സാമ്പത്തിക സംസ്കാരത്തിൽ വലിയ മാറ്റം സൃഷ്ടിക്കുന്നതാണ് ഈ ഇഷ്ടം. നിരവധി ജെൻ സി അബദ്ധത്തിൽപ്പെടുന്നതിനു പിന്നിൽ ട്രേഡിങ്ങിനെക്കുറിച്ചുള്ള തെറ്റിധാരണകളും അറിവില്ലായ്മയുമാണന്നു പറയാതെ വയ്യ.

പല സ്ഥാപനങ്ങളും നിലനിൽക്കുന്നത് ഷെയറിന്റെ ബലത്തിലാണ്. പൊതുജനങ്ങളിൽ നിന്ന് ഫണ്ട് ശേഖരിക്കുകയാണ് ഷെയറുകളുടെ ലക്ഷ്യം. ഇനിഷ്യൽ പബ്ലി ക് ഓഫർ (ഐപിഒ) എന്ന് ഇതിനെ പറയാം. ഐപിഒ കഴിഞ്ഞാൽ കമ്പനി ഷെയറുകൾ നാഷനൽ സ്റ്റോക് എക്സ്ചേഞ്ച്, ബോംബെ സ്റ്റോക് എക്സ്ചേഞ്ച് തുടങ്ങിയ സ്റ്റോക് മാർക്കറ്റുകളിൽ ലിസ്റ്റ് ചെയ്യപ്പെടും.

ഐപിഒയിൽ വാങ്ങുന്ന ഷെയറുകൾ, സ്റ്റോക് ബ്രോക്കർമാരുടെ സഹായത്തോടെ എൻഎസ്ഇയിലും ബിഎസ്ഇയിലും വിൽക്കാം.

എന്താണ് ട്രേഡിങ്?

ലാഭം നേടുക എന്ന ലക്ഷ്യത്തോടെ സ്റ്റോക്ക്, കറൻസി തുടങ്ങിയവ വാങ്ങുന്നതിനേയും വിൽക്കുന്നതിനേയും ട്രേഡിങ് എന്നു പറയാം. സ്റ്റോക്ക് മാർക്കറ്റിൽ മികച്ച പ്രകടനം കാഴ്ചവയ്ക്കുന്ന കമ്പനിയുടെ ഷെയർ വാങ്ങുന്നത് മികച്ച നിക്ഷേപമാണ്.